کابل باخترد ثور دمياشتې ٣٠ :
دملي دفاع وزارت ويندوى وايي: د وسله والومخالفينو دبريدونو زياتوالى نه شي کولاى حالت د هغوى په ګټه بدل کړي .
دغه څرگندونې په داسې حال کې کيږي چې په دې وروستيو وختوکې په امنيتي ځواکونو د طالبانو بريدونو زور موندلي دي او داسې اطلاعات شته چې يوشمير ديني مدرسې په قبايلي سيموکې رخصتې شوې دي او طالبان يې افغانستان ته استول شوي دي .
دباخترآژانس دخبريال دخبرله مخې :
دملي دفاع وزارت ويندوى جنرال محمدظاهرعظيمي چې نن يې دحکومت درسنيو په مرکزکې په يوه خبري غونډه کې خبرې کولې؛ څرگنده کړه: زه طالبانو ته په صراحت سره بيانوم چې په هيڅ صورت به حالات د هغوى په ګټه بدل نه شي. ملي اردو د دې ځواکمني لري چې هر راز ګواښ شنډ او حالات په خپل کنترول کې ولري.
د جنرال عظيمي دڅرگندونو له مخې: اوس په سلوکې نوي عمليات دملي اردو په غاړه دي. دغه شمير به تريوې مياشتې پورې په سلوکي سلو ته ورسيږي.
ده وويل: دقندهار ، هلمند، شمالي اوختيځو ولايتونو امنيتي حالت ښه شوى دى.
جنرال عظيمي ددغه وزارت د داخلي اوتشکيلاتي اصلاحاتو په باب هم خبرې وکړې او د هوايي ځواکونو په سمبالولو يې ټينګار وکړ .
ده يادونه وکړه: دملي دفاع وزارت دهوايي ځواکونو په برخه کې له ستونزو سره مخامخ دي، خو هلې ځلې کيږي چې دغه ستونزې کمې شي.
ده د سلو مليونو ډالرو په ارزښت دپنځو انتونوف ډوله الوتکو پيرودلو ته اشاره وکړه چې دماليې وزارت له بودجې څخه به ورکړى شي .
دغه راز ده يادونه وکړه چې دهوايي ځواکونو د سمبالولو په مقصد به د امريکا او د نورو دوستو هيواونو مرستې جلب شي .
په دې غونډه کې چې د ايساف او د ناټو استازو هم ګډون کړى و؛ افغان امنيتي مرکزونو ته د ناټو دپوځي اډو د سپارلو په باب وويل: يو ګډ کميسيون جوړشوى دى چې له دغو اډو څخه د اغيزمنې استفادې او ستراتيژي ارزښت تشخيص کړي او هغه اډې چې دستراتيژيکي پلوه ارزښت نه لري او نه شي کيداى دملکي تاسيساتو لپاره ور څخه استفاده وشي؛ ويجاړيږي.
