کابل، د وږي ۱۶مه، باختر
د کډوالو او راستنېدونکو چارو وزارت تېره ورځ له ایران څخه هېواد ته د ۱۰۱۶ افغان کډوالو د راستنېدو خبر ورکړی دی.
دغه وزارت په خپله اېکس پاڼه لیکلي، چې دغه کسان د هرات ولايت د اسلام قلعې بندر له لارې راستانه شوي، چې په يادو راستنېدونکو کې کورنۍ او مجردان شامل دي، چې له ډلې يې ۵۵۸ تنه د مرستو په موخه د کډوالو نړيوال سازمان ته ور پېژندل شوي دي.
د یادونې وړ ده، چې دغه وزارت وړمه ورځ هم هېواد ته له ایران څخه د څه باندې ۲ زره افغان کډوالو د راستنېدو خبر ورکړی و.
