۱۵– بهرنۍ رسنۍ، د غوايي۲۴مه
ټاکل شوې چې د اذربایجان او ارمنستان جګپوړي چارواکي د سولې موافقې ته د رسېدو لپاره بلجیم ته سفر وکړي، خو په تازه نښتو کې د دواړو هېوادونو یو یو سرتېری وژل شوی دی.
د بهرنیو رسنیو د راپورنو له مخې د دواړو هېوادونو پوځیانو په سرحدي سیمو کې په یو بل په داسې حال کې ډزې کړي چې ټاکل شوې د آذربایجان جمهور رئیس الهام علیوف او د ارمنستان صدراعظم نیکول پاشنیان د یکشنبې په ورځ د بلجیم پایتخت بروکسل کې خبرو ته سره کښیني.
د ارمنستان د دفاع وزارت په یوه خبر پاڼه کې ویلي چې په تازه شخړو کې د بې پیلوټه یا ډرون الوتکو څخه هم کار اخیستل شوی او په ډزو کې د ارمنستان یو سرتېری وژل شوی او یو بل ټپي شوی.
ها خوا بیا د اذربایجان دفاع وزارت ویلي چې په سرحدي سیمو کې یې په ځواکونو ارمنستان لخوا د بې پیلوټه الوتکو برید شوی او یو سرتیری یې وژل شوی.
د یادونې وړ ده چې تازه جنجال دوه اوونۍ وړاندې هغه وخت پیل شو چې اذربایجان د لاچین په ولسوالۍ کې د تالاشۍ پوسته واچوله او ارمنستان دا کړنه د اوربند څخه سرغړونه بللې ده.
بهیر
