خبرونهفرهنګټولنهTOP

د اطلاعاتو او فرهنګ وزارت، د مطالعې دود کولو سمینار جوړ کړ

 کابل، غبرګولي۹مه، باختر

د اطلاعاتو او فرهنګ وزارت له لورې په هېواد کې د مطالعې فرهنګ د پیاوړي کولو په موخه د یاد وزارت د غونډو په نړیوال تالار کې د (مطالعې دود کول) تر عنوان لاندې یو ورځنی سمینار جوړ کړ.

دغه سیمنار چې د یاد وزارت د فرهنګ او هنر معنیت اړوند د عامه کتابتونو د یوې ورځې لپاره جوړ کړی و، ګډوانولو ته يې د مطالعې په اړه هر اړخیز معلومات وړاندې کړل.

د اطلاعاتو او فرهنګ وزارت د فرهنګ او هنر معین مولوي عتیق الله عزيزي د سمینار ګډونوالو ته د کتاب د ارزښت په اړه خبرې وکړې او ویې ویل چې کتاب د نړۍ د پرمختګ یوازېنی عامل دی او بشر د مطالعې په مرسته د کمال لوړو درجو ته رسوي.

نوموړي همدارنګه وویل: افغان ځوانان  چې تازه د جګړې له ګردابه را وتلي، اوس يې وار دی چې د مطالعې لپاره وخت ځانګړی او ځانونه د پوهې په ګاڼه سمبال کړي.

عزيزي زیاته کړه چې د اطلاعاتو او فرهنګ وزارت په هېواد کې د مطالعې لپاره د زمینې او اسانتیاوو برابرولو ته ژمن دی او د مطالعې فرهنګ عامولو لپاره به خپلې هڅې لا ګړندۍ کړي.

په ورته وخت کې د عامه کتابتونو رئيس قاري عبیدالله حنیف له خلکو غوښتنه وکړه چې د ورځنیو کارونو تر څنګ دې مطالعه هم له یاده نه باسي.

حنیف زیاته کړه، د سیاسي لوبو له ښکار کېدو څخه د ځان ژغورنې یوازېنۍ لاره مطالعه ده او د خپل تاریخ او فرهنګ پېژندلو لپاره هم مطالعه اړینه ګڼل کېږي.

نوموړي په هېواد کې د مطالعې فرهنګ د دود کولو لپاره د ولس همکاري اړینه وبلله او له کورنیو څخه يې غوښتنه وکړه چې خپل اولادونه د کتابونو مطالعې ته وهڅوي.

د غونډې ګډونوالو په خپلو خبرو کې کتابونه د تمدنونو ترمنځ د وصل نقطه وبلله.

دوی همدارنګه مطالعه د فرهنګي هویت ساتلو لپاره د ټولنې مهمه اړتیا یاده کړه او ټینګار وشو چې د پرمختللو هېوادونو د پرمختګ یو ستر لامل هلته د کتابونو د لوستلو او مطالعې د فرهنګ عاموالی دی.

په پای کې ګډونوالو په هېواد کې د مطالعې فرهنګ د رواجولو لپاره دا ډول سمینارونه مهم وبلل او له اطلاعاتو او فرهنګ وزارت څخه غوښتنه وشوه چې دا لړۍ دې جاري وساتي.

د یادونې وړ ده چې په هېواد کې د مطالعې فرهنګ د دود کولو په موخه په ۱۳۴۴ لمریز کال کې عامه کتابتون جوړ شو، چې اوسمهال د عامه کتابتونونو د ریاست اړوند په ټول هېواد کې ۹۵ عامه دولتي کتابتونونه موجود دي او همدارنګه ۲۸ عامه خصوصي کتابتونه هم فعال دي.

افغانمل

نمایش بیشتر

نوشته های مشابه

دکمه بازگشت به بالا