کابل، د وږې۱۱ مه، باختر
د بدخشان د سرحدي ولسوالیو ګډ بازارونه چې د کرونا ویروس له خپرېدو سره سم د سوداګرو پرمخ تړل شوی و، نن د سیمه ییزو چارواکو له خوا په رسمي ډول بیا پرانیستل شول.
د بدخشان د اطلاعاتو او کلتور رييس معزالدين احمدي باختر آژنس خبریال ته وويل، چې د بدخشان په اشکاشم، شغنان، نسي او خواهان ولسواليو کې څلور ګډ بازارونه چې د دواړو هېوادونو محصولات د پلور لپاره په کې نندارې ته اېښودل کېږي د سیمه ییزو چارواکو له لوري بیا پرانیستل شول، او له دې وروسته سوداګر کولی شي په اوونۍ کې یو ځل خپل سوداګریز توکي د پلور لپاره دغو بازارنو ته وړاندې کړي.
نوموړي زیاته کړه، چې په یاد بازارونو کې مجاز مالونه او کلیوالي لاسي صنایع پلور ته وړاندې کېږي، خو د اسلامي امارت د قوانینو له مخې دغو بازارونو ته د الکولي، نشه يي توکو او نورو ممنوعه توکو د ننوتلو مخه د دواړو غاړو د مسوولینو له لوري نیول کېږي .
هغه زیاته کړه، چې د دغو بازارونو په پرانیستلو سره به د اشکاشم، شغنان، نسي او خواهان ولسوالیو اوسېدونکو ته د کار زمینه هم برابره شي.
هغه ټینګار وکړ، چې د دغو بازارونو پرانیستل د یو مثبت ګام بېلګه ده او د سیمې او نړۍ ټولو هېوادونو ته ښودل دي، چې د افغانستان له لوري هېڅ هېواد ته ګواښ نشته او اسلامي امارت په دې برخه کې بریالی او له نړۍ سره یې خپلی سوداګریزي اړیکې ټینګې کړې دي.
