‘-کابل – باختر د لړم دمياشتې ٢٢ د افغانستان د اسلامي جمهوريت اجراييه رييس نن سهار د ډنمارک د بهرنيوچارو وزير سره د سپيدار په ماڼۍ کې د خپل کار په دفتر کې وکتل. د افغانستان د اسلامي جمهوريت د اجراييه رياست مطبوعاتي دفتر باختر آژانس ته خبر ورکړ: په دې کتنه کې د ډنمارک د بهرنيو چارو وزير د ملي وحدت د حکومت د جوړيدو له امله ډاکتر عبدالله عبدالله ته مبارکي وويله او يوځل بيا يې له افغانستان سره د خپل هيواد ملاتړ اعلام کړ. د ډنمارک د بهرنيو چارو وزير د خپلو خبرو په دوام زياته کړه: هيواد يې د راتلوونکو دريو کلونو لپاره له افغانستان سره ٩٠ مليونه ډالره مرسته برابروي او په پوځي برخه کې هم خپلو همکاريو ته دوام ورکوي. د افغانستان د اسلامي جمهوريت اجراييه رييس افغانستان ته د ډنمارک د بهرنيو چارو د وزير د سفر هرکلى وکړ؛ له افغانستان سره يې د دغه هيواد د همکاريو او ملاتړ له امله قدرداني وکړه. اجراييه رييس زياته کړه: د ملي وحدت حکومت له فساد سره په مبارزه کې د نظر په يو والي او غوڅې ارادې سره عمل کوي. د نوې کابينې جوړول، له اداري فساد سره مبارزه، پارلماني او د ولسواليو د شوراګانو انتخابات، اصلاحات، شايسته سالارۍ، د ښځو حقوق، د سولې بهير، له ګاونډيو هيوادونو سره اړيکې، په افغانستان کې د طبيعي زيرمې په تېره بيا تيل او ګاز او له تروريزم سره مبارزه هغې مسئلې وې چې په دې کتنه ورباندې خبرې وشوې.
