کابل باختر دمرغومي دمياشتې ٢٩ :
د کورنيو چارو وزارت سرپرست په هغې امنيتي غونډه کې چې پرون په دغه وزارت کې جوړه شوه د هېواد د امنيتي حالاتو دڅيړنې په ترڅ کې د هېواد د مستقلانه دفاع په لاره کې د ملي پوليسو د ځواکونو په لا زيات تياري باندې ټينګار وکړ.
د کورنيو چارو وزارت مطبوعاتي دفتر باخترآژانس ته خبر ورکـــړ :
د کورنيو چارو وزارت سرپرست ستر پاسوال محمد ايوب سالنګي په هغې غونډه کې چې پرون سهار د دغه وزارت له مشرتابه هيئت او جګپوړو مسوولينو سره لرله ، د هېواد امنيتي حالات وڅيړل او د هېواد د مستقلانه دفاع په لاره کې يې دملي پوليسو ځواکمني ، وړتيا او د ظرفيت په لوړولو باندې ټينګار وکــړ.
ده يادونه وکړه: تروريستي ډلګي په هر نامه چې دي ، هدف يې د خلکو د عادي ژوندانه د بهير ګډوډول او د افغانستان د اسلامي جمهوريت د دولت د پرمختيايي پروګرامونو د عملي کيدو مخنيوى دى.
ده څرګنده کړه: هغه عمليات چې په دې وروستيو وختو کې د تروريستانو او دسازمان موندلو مجرمينو له شتون څخه د کابل ښار دپاکولو په لاره کې ترسره شول ، مثبتې نتيجې لرې او دا کار د ملي پوليسو د منسوبينو د ظرفيت او ځواکمني دلوړولو څرګندوى دى .
دغه څرګندونې په داسې حال کې کېږي چې له افغانستان څخه د بهرنيو ځواکونو په وتلو سره د تروريستي ډلګيو فعاليت زور اخيستى دى او د داعش د تروريستي ډلــې دظهـــور او آوازه هـــم اوريدل کيږي خو زموږ امنيتي ځواکونه د نړيوالـــو ځواکونو له وتلو وروسته لا زيات فعال شوي دي .
0 1 دقیقه لوستل