کابل، د غوایي ۱۰مه، باختر
د ترانسپورت او هوايي چلند وزارت په لنډه مهاله توګه د ځینو بهرنیو سکتورونو لپاره د الوتنو د ټکټ نرخونه ټاکلي دي.
دغه وزارت په یوه خبرپاڼه کې ویلي، چې د ځینو بهرنیو سکټورونو (کابل – جدې، کابل – دوبۍ، کابل – استانبول، کابل – ریاض) د الوتنو د ټکټ بیه په لنډ مهاله توګه ټاکل شوې ده.
په خبرپاڼه کې راغلي چې له دې نرخ وروسته به راتلونکی نرخ د هوايي شرکتونو د استازو او د ترانسپورټ او هوايي چلند وزارت د تخنیکي ټیم د ناستې له لارې د ټولو عملیاتي لګښتونو په پام کې نیولو سره ټاکل کېږي.
د يادونې وړ ده، چې دا مهال د (کابل- جدې- کابل) له سکټورونو څخه د يو طرفه الوتنو بيه له ٩٤٠ ډالرو څخه ٧٨٠ ډالرو او د (کابل- رياض- کابل) له ١٠١٠ ډالرو څخه ٨٢٠ ډالرو ته راکمه شوې ده.
تر دې مخکې د ترانسپورت او هوايي چلند وزارت مشرتابه د کام ایر او آریانا افغان هوايي شرکت له استازو سره د الوتنو د ټکټ د نرخ په اړه د خلکو شکایتونه شریک کړي وو.
لمر
