کابل/ د غویي ١٦ مه / باختر
د افغانستان د اسلامي جمهوریت جمهورريیس محمد اشرف غني پرون مازیګر د عدم انسلاک غورځنګ غړو هېوادونو د اړیکو انلاین ګروپ غونډه کې چې کرونا ویروس سره د مبارزې په برخه کې د لا زیاتې همغږۍ په موخه د اذربایجان جمهورريیس الهام علي اوف په نوښت باکو ښار کې جوړه شوې وه، ګډون او وینا وکړه.
دجمهوررييس دوياند دفترباخترآژانس ته خبرورکړ.
په دې ویډیو کنفرانس کې، پر جمهورريیس غني او د اذربایجان جمهورريیس الهام علي اوف سربېره، د دې سازمان غړو دولتونو، حکومتونو او بین المللي بنسټونو مشرانو خپلو ویناوو کې، د کرونا ویروس د خپرېدو مخنیوي پر ضد د همغږۍ د زیاتوالي په اړه، خپل لیدلوري بیان کړل.
لومړی د اذربایجان جمهورريیس الهام علي اوف خبرې وکړې او د عدم انسلاک غورځنګ غړو هېوادونو څخه یې وغوښتل چې په همغږۍ، پیوستون او یووالي کرونا ویروس څخه رامنځته کېدونکو ستونزو سره مبارزه وکړي او په دې برخه کې خپلې هڅې منسجمې کړي.
هغه همداراز، کرونا ویروس سره د مبارزې په برخه کې د اذربایجان د اقداماتو یادونه وکړه او زیاته یې کړه، د عدم انسلاک غورځنګ غړو هیېوادونو ترمنځ پر دې ستونزو د بریالي کېدو لپاره تر بل هر وخت زیات پیوستون او یووالی محسوسېږي.
وروسته د ملګرو ملتونو سرمنشي انتونیو ګوتریش خبرې وکړې او د دې غونډې د جوړېدو له امله یې د عدم انسلاک غورځنګ د غړو هېوادونو د نوښت ستاینه وکړه ويې ویل، کویډ ۱۹ په نړۍ کې د میلیونونو انسانانو ژوند ته زیان اړولی او له هغه سره د مبارزې لپاره د نړۍ په کچه همغږو هڅو ته اړتیا ده.
هغه دې ته په اشارې چې د روغتیا نړیوال سازمان کرونا ویروس سره د مبارزې لپاره له ټولو هېوادونو سره کار کوي، د نړۍ له ټولو هېوادونو وغوښتل چې خپل ټولنیز او اقتصادي خنډونه مدیریت کړي.
په دې غونډه کې د اروپایي ټولنې کمیسیون ريیس کرونا ویروس سره د مبارزې په برخه کې د نړۍ د هڅو پر بسیج او همغږي کولو او کرونا ویروس سره د مبارزې لپاره د دې ټولنې په همکارۍ خبرې وکړې.
جمهورريیس په خپله وینا کې نړۍ او په ځانګړي ډول د عدم انسلاک غورځنګ غړو هېوادونو لپاره د کرونا ویروس منفي عواقبو ته په اشارې وویل: د دې ویروس د خرابۍ او مختل کوونکي اغېز کچه او محدوده له دې پدیدې سره د ګډو هڅو، د ستونزو زغملو، د پیوستون روحیې عامولو، دشهروندۍ جوړښتونو پياوړتیا او په سیمه ییزه او بین المللي کچه د همکارۍ پر اساس د ستراتېژیو جوړولو له لارې قوي ټولیز ځواب ته اړتیا لري.
هغه زیاته کړه، موږ د نړۍ په کچه د کویډ ۱۹ ویروس زیانمنو سره غمشریکي او پيوستون څرګندو او په دې شېبو کې د هغوی ترڅنګ ولاړ یوو. موږ د طبي متخصصینو د قهرمانانه هڅو ډېره زیاته قدرداني کوو او په ټوله نړۍ کې پر دې نړیوالې ستونزې د بریالي کېدو لپاره د کرونا واکسین جوړولو په برخه کې د نړۍ په کچه د علمي ټولنو ملاتړ کوو.
جمهورريیس وویل: د عدم انسلاک ماهیت ته د درناوي لپاره لازمه ده چې کویډ ۱۹ سره د مقابلې لپاره د ملي او څو اړخیزه همکاریو په موخه لازم انسجام او همغږي رامنځته کړو او بېوزلۍ، لوږې، محرومیت، نابرابرۍ او بې ثباتۍ سره د مبارزې په برخه کې د عدم انسلاک غورځنګ د ټولیزو لاسته راوړنو د ساتنې لپاره قوي اراده ولرو.
جمهورريیس کرونا ویروس سره د مبارزې په برخه کې د افغانستان حکومت د هڅو په اړه معلومات ورکړل ويې ویل، مشورې موږ د دې وړ ګرځوي چې د خپلې ټولنې اسیب پذیري تشخیص کړو او له دولت څخه د خپلو هېوادوالو په توقعاتو وپوهېږو.
جمهورريیس غني له افغانستان سره د نړیوالو او سیمه ییزو مرستو مننه وکړه ويې ویل: دا چې موږ لا تر اوسه د عامه پوهاوي او اعتراف په مرحلو کې یوو، د وړاندوینې هوډ نه لرو، خو غواړو خپله ټوله پاملرنه د احتمالي فلاکت او ورپسې د ارامۍ او عادي وضعیت ته د ګرځېدو په مرحلو متمرکزه کړو.
د هيواد جمهورريیس د دې په بیانولو سره چې جګړې کرونا ویروس سره د مبارزې په برخه کې زموږ پر هڅو منفي اغېز کړی دی وویل، طالبان باید بشري اوربند ومني او د عدم انسلام غورځنګ له ټولو غړو څخه یې وغوښتل پر طالبانو غږ وکړي چې له خپل غیر منطقي تاوتریخوالي لاس واخلي او په افغانستان او سیمه کې د سولې او ثبات ټینګښت لپاره له سیاسي بهیر سره یو ځای شي.
جمهورريیس د خپلو خبرو په پای کې وویل، موږ د افغانستان خلکو چې د ۴۰ کلونو نیابتي جګړې زیات زیانونه ګاللي دي، غواړو هيواد مو د سیمه ییزو او بین المللي همکاریو په بستر بدل شي.# پاى- ذ
