خبرونهاقتصاد

د قوش‌تېپې کانال د چارو د لا چټکتیا په موخه د څار کمېټه جوړېږي

 کابل ، د غبرګولي ۱۴مه ، باختر

د چارو ادارې لوی رئیس ویلي، چې د قوش‌تېپې کانال ته ځانګړې شوې بودجې د لګښت او د دې پروژې د چارو د لا چټکتیا لپاره د څار کمېټه جوړېږي.

باختر آژانس ته په را رسېدلې خبرپاڼه کې ویل شوي چې په همدې مناسبت د چارو ادارې د لوی رئیس مولوي احمد جان احمدي په مشرۍ او د دغې ادارې د انسجام د مرستیال شیخ الحدیث مولوي نورالحق انور او د ملي پراختیا شرکت د عمومي رئیس عبدالرحمن عطاش په ګډون ناسته جوړه شوې ده.

په دې ناسته کې د چارو ادارې لوی رئیس ویلي چې د یاد کانال لپاره د منظورې شوې بودجې په خپل وخت رسېدو، مناسب لګښت او د چارو د چټکتیا لپاره سره راټول شوي چې په بشپړېدو سره به یې زرګونه جریبه ځمکه خړوبه شي.

په همدې حال کې، د ملي پراختیا شرکت عمومي رئیس عبدالرحمن عطاش هم، په ناسته کې معلومات شریک کړي او څرګنده کړې یې ده چې د دې پروژې په تطبیق سره به د هېوادوالو هیلې پوره شي او هېواد به د ځان بساینې په لور مهم ګام واخلي.

د ناستې په پای کې د یوې لوړپوړې څارندویې کمېټې پر جوړولو پرېکړه شوې ده چې وخت په وخت د کار له څرنګوالي څارنه وکړي او مشرتابه ته د فعالیتونو راپورونه هم ورکړي.

د یادونې وړ ده چې د قوش‌تیپې کانال د هېواد په شمال بلخ کې له سترو کانالونو څخه دی چې د جوړېدو چارې یې د روان کال د وري په (۱۰مه) د اسلامی امارت د لوړ پوړو چارواکو له خوا پیل شوې.

دغه کانال چې ۲۸۵ کیلومتره اوږدوالی لري، د آمو له سیند څخه پيل د حیرتانو له دښتو څخه تېریږي؛ د بلخ تر دولت آباد، د جوزجان، آقچې او فاریاب اندخوی ولسوالیو پورې رسېږي.

د دغه کانال لومړۍ برخه چې ۱۰۸ کیلومتره ده، په یوه کال کې او دویمه او درېیمه برخه یې چې ۱۷۷ کیلومتره ده، په راتلونکو پنځه کلونوکې به بشپړه شي.

وهاج

نمایش بیشتر

نوشته های مشابه

دکمه بازگشت به بالا