کابل، د وږي ۱۳مه، باختر
د ننګرهار د کرنې، اوبولګولو او مالدارۍ ریاست په هڅو د دې ولایت د مومندرې ولسوالی په باسول کلي کې د ۷ زره ډالرو په لګښت د مالدارانو د ستونزو د حل په پار د حیواني خوراکې زېرمتون (فیډ بینک) ګټي اخیستنې ته وسپارل شو.
د دغه ولایت د کرنې ریاست د مالدارۍ آمر محمد ضمیر بهسودي وویل، چې د حیواني خوراکې زېرمتون د افغانستان لپاره د هالینډ کمېټې د ار.پي.ایس.اف پروژې لخوا جوړ شوی، چې د دې حیواني خوراکې زېرمتون په جوړولو سره به د مومندرې کوچي او ځایي څارویو لرونکو ته د حیواني خوراکې په برخه کې آسانتیاوې برابرې او د دوی ستونزې به حل شي.
دغه راز په یادو پیسو د حیواني خوراکې لپاره ودانۍ، ماشینري، د حیواني خوراکې اومه مواد او ګڼ نور وسایل واخیستل شول، ترڅو مالدارانو ته ښه او غوره چوپړتیاوې وړاندې کړي.
د دې مرستې موخه په دې ولسوالۍ کې د مالدارانو ستونزو ته رسېدنه او په ټوله کې د مالدارۍ سکټور ودې او پراختیا ته زمینه برابرول دي.
