د اندراګاندي روغتون په انګړ کې د يوه نسايي ولادي روغتون د جوړولو کار پيل شو

کابل باختر دوري دمياشتې ١٣ نيټه :
د نسايي او ولادي  د يوه روغتون د جوړولو کار نن  د اندراګاندي  د روغتون په انګړ کې داجرايېه  رياست دمرستيال انجينرمحمدخان ، دعامې روغتيا د وزير  ډاکټر فيروالدين فيروز او د بيات د بنسټ ايښودونکي انجينر احسان الله بيات له خوا  پرانيستل  شو.
د باختر آژانس  دخبريال  د خبرله مخې ؛  دغه روغتون په  څلورو  پوړونو کې د سلو بسترو په ظرفيت  جوړيږي او د  ولادي او نسايي اوماشومانو ، د سترګو د تشخيصيې څانګه ، د ويني بانک ، دغوږ او ستوني څانګه  ، راديو ګرافي  او د سرطاني ناروغيو  لپاره د تحقيقاتي کلينيک څانګې لري  چې د بيات د بنسټ  په مالي مرسته  جوړيږي .
د اجرايېه رياست لومړي مرستيال انجينر محمد خان د دغه روغتيايي مرکز د جوړولو په لاره کې  له احسان الله بيات څخه  مننه وکړه او څرګنده يې کړه چې        انجينر احسان الله بيات ،  د بيات بنسټ له لارې  د خپلو مرستو ترڅنګ په هېواد کې  د پانګې اچونې له لارې خلکو ته دکار زمينې هم  برابرې کړي دي.  چې د ده دغه کار نه يوازې  کارموندنه  زياتوي بلکي  نور کورني او بهرني سوداګر هم   په هېواد کې پانګې اچونې ته  هڅوي.
د عامې روغتيا وزير  ډاکټر فيروزالدين فيروز  د خلکو په  استازيتوب د دغه روغتون د جوړولو په لاره کې د بيات بنسټ د مالي مرستې له امله  مننه وکړه  او  څرګنده يې کړه  چې د بيات بنسټ  تل  د روغتونونو او کلينيکونو دجوړولو او د طبي وسايلو د تجهيزاتو په برخو کې  دروغتيا له برخې سره همکاري کړې ده.
د عامي روغتيا وزير ډاکټر فيروز  د روغتيايي خدمتونو د وړاندې کولو په تېره بيا د ميندو اونويو  زيږيدلو ماشومانو د مړينې  دکچې د کمښت په لاره کې د دغه  روغتون  جوړول  ګټور وبلل او ويې ويل ؛ چې دغه  تخصصي روغتون په اساسي او معياري ډول او په پرمختللو طبي وسايلو سمبال جوړيږي  چې  د ولادي ، سترګو،غوږ اوستوني پيچلې پيښې به په کې په عصري ډول تداوي کېږي .
لکه څنګه چې تر اوسه  پورې دميندو اوماشومانو روغتيايي مرکزونه  جلا و  او د دغه روغتون په جوړيدو سره به  دلومړي ځل لپاره دميندو اوماشومانودرملنه په يوه روغتيايي مرکز کې ترسره  کېږي .
ډاکټر فيروزالدين دغه راز ټينګار وکړ چې د عامې روغتيا وزارت  هلې ځلې کوي څو هغو کسانو ته  دپيچلو ناروغيو د درملنې زمينه  برابره کړي چې د درملنې په خاطر بهر ته  ځي او د شيخ زاهد په روغتون کې  داعصابو دجراحۍ د مرکز  جوړول  د دغو هلوځلو يوه بېلګه ده.
له بله پلوه انجينر احسان الله بيات د دغه روغتون  جوړول د ميندو اوماشومانو يوه  مهمه اړتيا وبلله او  ويې  ويل ؛  دغه  روغتون هغو ميندو ته  د درملنې خدمتونه  چې د اختلاطي زيږونونو له خطر سره مخامخې دي   د تداوى خدمتونه وړاندې کړي  او د بيات بنسټ  دخپل جوړيدو له وخت  څخه تراوسه پورې روغتيايي  خدمتونو ته د خلکو د لاسرسي په مقصد د هېواد په بېلابېلو سيمو کې  ١٣ روغتيايي مرکزونه  جوړ کړي دي او دغه راز د طبي  وسايلو له پلوه يې هم د هېواد  يوشمېر روغتونونه سمبال  کړي دي . پاى ج ذ