کابل، زمري ۲۴مه، باختر
د پروان ولایت روغتیايي چارواکي وايي چې د دې ولایت د سیاګرد او شینوارو په ولسوالۍ کې د سېلاوونو د راوتلو له کبله ۳۱ مړه او ۱۷ تنه نور ټپیان شوي دي.
د یاد ولایت د عامې روغتیا مرستیال ډاکټر عبدالله افغانمل باختر آژانس سره په ټلیفوني خبرو کې وویل چې د غوربند درې په سیاګرد ولسوالۍ کې ۱۵ تنه مړه، ۱۶ تنه ټپیان او ګڼ شمېر نور ورک شوي دي.
د افغانمل په وینا د ذکر شوې مرګ ژوبلې تر څنګ دوه فلانکوچ ډوله موټر له سپرلیو سره یو ځای ورک شوي دي.
په ورته وخت کې بیا د یاد ولایت د عامې روغتیا رئیس ډاکټر هدایت الله عزام وایي چې شینوارو ولسوالۍ کې ۱۶ تنه مړه ۵ ټپیان، شاوخوا سل تنه ورک او دوه کلي ـــ تیکمر او ښیوې خوله ــ په مکمل ډول ویجاړ شوي.
نوموړی وایي ښایي د مړو او ټپیانو شمېر نور هم لوړ شي.
یادو زیانمنو شویو سیمو ته د طبیعي پیښو پر وړاندې د مبارزې وزارت د پالیسۍ معین، د یاد ولایت والي، امنیه قومندان، د ټول ګټو رئیس د یاد ولایت د طبیعي پیښو پر وړاندې د مبارزې، د سرې میاشت او عامې روغتیا ریسان تللي وه؛ ترڅو هغوي ته لومړني او صحي توکي ورسوي.
د یادو سېلاوونو له کبله د کابل – بامیان ولایتونو لار هم د ترافیکو پر مخ تړل شوې ده.
ع.ا
