کابل، د زمري ١٢مه، باختر
د کرنې، اوبو لګولو او مالدارۍ وزارت سرپرست مولوي عطاء الله عمري له مل پلاوي سره نورستان ته سفر وکړ.
نوموړي خپل سفر په ترڅ کې د نورستان والي شیخ شیراحمد حقاني او ددي ولایت کرنې، اوبولګولو او مالدارۍ رئیس مولوي سليمان ایمن او ولسي خلکو سره په یوه جوړه شوې غونډه کې ګډون وکړ.
د یادې غونډې پیل کې د دغه ولایت د کرنې، اوبو لګولو او مالدارۍ رئيس مولوي سليمان ایمن د ښه راغلاست ویلو ترڅنګ خپلو ترسره کړو فعاليتونو په اړه معلومات شریک او د ځنګلونو په ارزښت یې خبرې وکړې.
ورپسې د کرنې، اوبولګولو او مالدارۍ وزارت سرپرست مولوي عطاء الله عمري وویل: زموږ د سفر موخه د نورستان ځنګلونو او طبیعي زېرمو ساتنه او بیا احیا کول دي.
هغه زیاته کړه، نورستان ښکلي طبيعت لري او د لا ښېرازي لپاره ډېر کار ته اړتيا ده.
نوموړي وویل، چې د کرنې، اوبولګولو او طبيعي زېرمو په برخو کې د ولسونو او کروندګرو سره یو ځای کار کوو، ترڅو د دې ولایت خلک کرنې او مالدارۍ ته وده ورکړي او خلک يې په ځان بسيا شي.
عمري زیاته کړه، د تېرو دولتونو په وخت کې اوبه نه وې مهار شوې او اسلامي امارت په دې برخه کې کار کولو ته کافي بودجه لري.
لمر،جلالي
