کابل، د وږي ۲۶مه، باختر
د ملي دفاع وزارت اړوند ۲۰۳ منصوري قول اردو د ښوونیز پوځي مرکز څخه ۵۰۰ سرتېري د درې میاشتني مسلکي پوځي او عقیدوي زده کړو څخه وروسته تېره ورځ د یو لړ شاندارو مراسمو په ترڅ کې فارغ شول.
ملي دفاع وزارت په خپله اېکس پاڼه لیکلي، چې د یادو سرتېرو په فراغت غونډه کې د ملي دفاع وزارت لومړي مرستيال الحاج ملامحمد فاضل مظلوم، د وسله وال پوځ لوی درستیز مرستيال حاجي مالي خان صدیق، د یادې قول اردو مرستيال قومندان د پکتيا والي، ګڼ شمېر مسوولینو او مشرانو ګډون کړی و.
دغه وزارت زیاته کړې، چې مسوولینو د جهاد په اهدافو، د شرعي او اسلامي نظام په ټینګښت او ساتنه هر اړخیزې ويناوې وکړې او زیاته یې کړه، چې همدغه د ملي اسلامي اردو مسلکي زړور ځواکونه به په هر ډول حالاتو کې د خپلو خلکو، هېواد او د دې شرعي او اسلامي نظام څخه په مېړانه ساتنه کوي او تل یې د هېواد له سرحداتو څخه په کلکه دفاع کړې ده.
همدا راز د فارغ شویو سرتېرو له لوري د بېلابېلو وسلو په استعمال سره عملي نمایشات او نور پوځي حرکات ترسره شول او یاد مراسم فارغانو ته د ستاینلیکونو په ورکولو سره پای ته ورسېدل.
د یادونې وړ ده، چې پرون هم په بلخ کې د ۲۰۹ الفتح قول اردو له ښوونیز او روزنیز مرکز څخه له درې میاشتني مسلکي پوځي او عقیدوي زده کړو څخه وروسته ۶۵۰ سرتېري فارغ شوي وو.
