کابل، د سلواغې ١٩مه، باختر
زابل ته د ځوانانو چارو معین قاري محمد یونس راشد د رسمي سفر په ترڅ کې د دغه ولایت د ځوانانو ستونزې او غوښتنې واورېدې.
په همدې موخه جوړه شوې غونډه کې د زابل مرستیال والي سلیمان آغا بهیر د ښه راغلاست ترڅنګ وویل، چې که ځوانان د ټولنې لپاره کار وکړي ټولنه او نظام به پیاوړی وي.
ورته مهال د ځوانانو چارو معین قاري محمد یونس راشد وویل، چې ځوانان زیاته انرژي لري او باید خپلو خلکو او ټولنې ته کار وکړي، ترڅو ځان او ټولنه د نورو له احتیاج څخه خلاصه کړي.
نوموړي زياته کړه، چې ځوانان باید د خپل شته اسلامي نظام ساتنه وکړي، ځکه موجود نظام د ولس څخه جوړ دی او دغه نظام به د ځوانانو په ملاتړ را پورته کېږي.
هغه وویل، چې اسلامي امارت مسوولیت لري، څو ځوانانو ته د دینی او عصري زده کړو زمینه برابره کړي، خو په بدل کې یې د ځوانانو څخه غوښتل کېږي، چې ټولنې ته د کار کولو ترڅنګ د خپل اسلامي نظام ملاتړ وکړي.
وروسته د ځوانانو او د ځوانانو چارو د معین قاري محمد یونس راشد تر منځ آزاد بحث او مناظره پیل شوه، چې په ترڅ کې یې ځوانانو خپل سوالونه، غوښتنې نظریات شریک کړل او د ځوانان چارو معین یې د حل ژمنه وکړه.
لمر
