کابل / د چنګاښ ۱۵مه / باختر
د عامې روغتيا وزارت اعلام کړى دى چې په تېرو ٢۴ ساعتو کې په هېواد کې ۱۵۵۶ کسان په کروناویروس اخته شوي دي.
د دغه وزارت د شمېرنو له مخې؛ په یاده موده کې په کروناویروس ۵۵ اخته کسان مړه شوي او ۹۳۲ تنه نور روغ شوي دي.
دا په داسې حال کې ده چې په هېواد کې هندي ډوله پرمختللي کروناويروس په چټکۍ سره د پراختيا په حال کې دى او ويل کېږي چې د دغه ويروس څلورمه څپه هم په نړۍ کې پېژندل شوې ده.
د عامې روغتيا وزارت شمېرنې ښيي چې په هېواد کې د کووېډ -۱۹ ناروغۍ د خپرېدو له پيله تراوسه پورې ۱۲۹ زرو ۲۱ مثبتې پېښې ثبت شوې دي چې له دې جملې څخه ۵ زرو ۴۱۵ تنه مړه شوي دي.
د عامي روغتيا وزارت له خلکو څخه غوښتي دي چې د کروناويروس د خپرېدو د مخنيوي لپاره روغتيايي لارښوونې او سپارښتونه رعايت کړي.
پای/ وهاج
