خبرونهفرهنګ

يو شمېر هنرمندانو او د رسنيو مسوولينو د هرات د اطلاعاتو اوفرهنګ له رييس سره وکتل

کابل، د غوايي١٨مه، باختر

د هرات د اطلاعاتو او فرهنګ رييس مولانا نعيم الحق حقاني  د تياتر له يو شمېر هنرمندانو او د رسانه يي بنسټونو له مسوولينو سره وکتل.

په دې کتنه کې د هرات د تياتر هنرمندانو وويل چې دوى  د دغه ولايت په ختيځو ولسواليو کې د يو لړ پروګرامونو د اجرا کولو په موخه د سفر نيت لري.

د هرات د تياتر مدير فريدون فکوري وايي چې اوس د هرات امنيتي حالت ښه دى، دوى غواړي چې د هرات ختيځو ولسواليو ته لاړ شي او د دغو ولسواليو خلکو ته  هنري نمايشات اجرا کړي.

د باختراژانس د خبرله مخې؛ فکوري د هرات ولايت د اطلاعاتو او فرهنګ له رييس څخه وغوښتل چې دغو ولسواليو ته د دوى د سفر زمينه برابره کړي.

په همدې حال کې مولانا نعيم الحق حقاني لرو پرتو ولسواليو ته د هنرمندانو د سفر هر کلى وکړ او ټينګار يې وکړ چې  په دې برخه کې له هنرمندانو سره همکاري کوي.

حقاني وايي چې د هرات د ولسواليو خلک د پوهاوي ورکولو او روزنيزو پروګرامونو ته اړتيا لري.

دغه راز د افغانستان د رسانه يي بنسټ رييس مصطفی صديقي د هرات د اطلاعاتو او فرهنګ له رييس سره په کتنه کې د افغانستان د رسانه يي بنسټ د معرفي کولو په ترڅ کې  له حقاني څخه وغوښتل چې د رسنيو او خبريالانو د يو لړ ستونزو په حل کولو کې همکاري وکړي.

په همدې حال کې حقاني وويل چې د هرات د اطلاعاتو او فرهنګ رياست د خبريالانو او رسنيو د ستونزو د حل کولو په موخه هر اړخيزه همکاري کوي.

مولانا نعيم الحق حقاني ټينګار وکړ چې د خبريالانو او د رسنيو د مسوولينو او د دغه رياست ترمنځ  د غونډو جوړول د دې سبب کېږي چې د خبريالانو او د رسنيو ستونزې ډېر ژر حل شي.

\ ج

دوام

ورته لیکنې

دکمه بازگشت به بالا