کابل باختردچنګاښ دمياشتې١٦نيټه : دافغانستان داسلامي جمهوريت دبهرنيو چارو وزارت سياسي معين حکمت خليل کرزي پرون کويټ ته دخپل سفر په بهېر کې ددغه هېواد دبهرنيو چارو وزارت له معين خالد الجارالله سره وکتل .
دبهرنيو چارو وزارت مطبوعاتي دفتر باختر آژانس ته خبر ورکړ .
دکويټ دبهرنيو چارو وزارت معين په افغانستان کې دسولې له بهير څخه دخپل متبوع هېواد دملاتړ ډاډ ورکړ او ويې ويل ؛ چې کويټ له افغانستان سره دخپلو اړيکو دپراختيا په مقصد په کابل کې دخپل سفارت د جوړولو غوښتنه کوي .
ده دغه راز په نږدې راتلوونکي کې افغانستان ته دکويټي هيئت داستولو خبر ورکړ .
دافغانستان دبهرنيو چارو وزارت سياسي معين په کابل کې دکويټ سفارت د جوړولو په باب دددغه هېواد حکومت دپريکړې هرکلى وکړ او هغه يې ددواړو هېوادونو ترمنځ داړيکو دپراختيا نښه نښانه وبلله.
دواړوغاړو دغه راز دافغانستان اوسيمې د امنيتي حالت او دسولې دبهير ، تجارتي اړيکو ، په کانونو کې دپانګې ا چونې دفرصتونو او د ګډو همکاريو دکميسيون د جوړولو په باب خبرې اترې وکړې.
دافغانستان داسلامي جمهوريت دبهرنيو چارو وزارت سياسي معين حکمت خليل کرزي پرون کويټ ته دخپل سفر په بهيرکې ددغه هېواد دبهرنيو چارو له وزير شيخ صباح الخالد الحمد الصباح سره وکتل . دکويټ دبهرنيو چارو وزير دغه هېواد ته دافغانستان دبهرنيو چارو وزارت دسياسي معين سفر ددواړو هېوادونو ترمنځ داړيکو دلازيات ټينګښت لپاره مهم وباله او دافغانستان دسولې دبهير په وړاندې يې دخپل متبوع هېواد دملاتړ ډاډ ورکړ . دکويټ دبهرنيو چارو وزير هيله څرګنده کړه چې دکويټ امير په افغانستان کې دسولې په ټينګښت کې ګټور رول ولوبوي .
دبهرنيو چارو وزارت سياسي معين څرګنده کړه چې افغانستان په هېواد کې د جګړې له دوام سره دمخالفت لپاره داسلامي ټولنې داجماع غوښتنه کوي او افغانستان له دغې داعيې څخه دخليج دهېوادونود غوڅ ملاتړ غوښتنه کوي. ده څرګنده کړه چې ټاکل شوې ده په نږدې راتلوونکې کې په افغانستان کې دسولې دتامينولو لپاره داسلامي عالمانو کنفرانس په سعودي عربستان کې جوړ شي.
دواړو لورو دغه راز دبين الوزارتي همکاريو دموافقه ليک دموادو دتطبيق په مقصد چې په ٢٠٠٧ ميلادي کال کې لاسليک شوى دى ديوه کميسيون د جوړولو په باب موافقه وکړه .
پاى جذ
