کابل، د غوايي ۹مه، باختر
د جوزجان ځايي مسوولین وايي چې په یاد ولایت کې د یوې غونډې په ترڅ کې د اسلامي امارت د مشرانو په منځګړیتوب د جوزجان ولایت یو اوسیدونکي د خپل زوی قاتل بخښلی دی.
په یاده غونډه کې د هېواد د اوبو او انرژۍ وزارت مرستیال ملا عبدالقهار حاجي ادریس او د ولایت مرستیال مولوي ګل محمد سلیم خپلو خبرو په ترڅ کې وویل، چې موږ له مرکزي او سیمه ییزو چارواکو سره یو ځای د وژل شوي کس پلار ته راغلي یو ترڅو دغه دښمني په عفو او بخښنه پای ته ورسوو.
همدارنګه په یاده غونډه کې یو شمېر چارواکو او دیني عالمانو هم د عفوې او بخښنې د فضیلتونو په اړه مفصلې خبرې وکړې.
د یادونې وړ ده، چې څه موده مخکې هم د یاد ولایت مرستیال مولوي ګل محمد سلیم د خپل پلار قاتل ته عفوه او بخښنه کړې وه.
جهانیار
