بهرنۍ رسنۍ، د وري ۲۷مه،
د متحده عربي اماراتو چارواکي وايي، چې د دوبۍ په یوه څو پوړیزه استوګنځي کې د اور لګېدنې له امله لږ تر لږه ۱۶ کسان مړه او ۹ نور ټپیان شوي دي.
د نشنل دولتي ورځپاڼې لیکلي، چې اورلګېدنه د الراس سیمې په اپارتمانونو کې رامنځته شوې، چې د ښار یوه له زړو سیمو څخه ده.
چارواکو تر اوسه په دې اړه څه نه دي ویلي، چې په دې پنځه پوړیزه ودانۍ کې ولې اور لګېدلی، خو د پېښې په اړه یې پلټنې پیل کړي دي.
د حکومت په اعلامیه کې د سوداګریزو او هستوګنې ځایونو له خاوندانو غوښتل شوي، چې د دې ډول پېښو د مخنیوي او د خلکو د ژوند د ژغورلو په خاطر د خوندیتوب لارښوونې او اصول مراعات کړي.
د یادونې وړ ده چې د ډېری هېوادونو خلک د دوبۍ په ګډون د متحده عربي اماراتو په نورو ښارونو کې ژوند کوي.
بهیر
