کابل – باختر د زمري دمياشتې ٢٨
په روزګان ولايت کې د نويو جګړو په بهيرکې وسله والو طالبانو ته د سر دروند زيان اوښتى دى .
دغه جګړې په تيرو ٢٤ ساعتونوکې ددغه ولايت په ځينو سيموکې رامنځته شوې دي.
لومړۍ جګړه پرون ناوخته د چهارچينو په ولسوالۍ کې هغه وخت ونښته چې پوځيانو د طالبانو د سپرلۍ په کاروان بريد وکړ.
په روزګان ولايت کې د ملي اردو يوه قوماندان د باختر آژانس خبريال ته وويل: په دې جګړه کې شپږ تنه وسله وال طالبان ووژل شول او څلور تنه نوريې ټپيان شول.
ده وويل: په دې جګړه کې سرتيرو او ملکي وګړو ته زيان نه دى اوښتى.
ديوبل خبرله مخې:
څلور تنه وسله وال طالبان د روزګان ولايت په خاص روزګان ولسوالۍ کې د جګړې په بهيرکې ووژل شول.
دغه جګړه تېره شپه د خاص روزګان ولسوالۍ په تګلوري کې هغه وخت ونښته چې طالبانو د پوځيانو په يوه پوسته بريد وکړ.
د روزګان ولايت د سيمه ييزو پوليسو يوه قوماندان د باختر آژانس خبريال ته وويل: په دې جګړه کې څلور تنه وسله وال طالبان ووژل شول او يو شمېر نوريې ټپيان شول.
په يوبل خبر کې ويل شوي دي: نهه تنه وسله وال طالبان د روزګان ولايت په دهراوود ولسوالۍ کې له پوځيانو سره د جګړې په بهيرکې ووژل شول. دغه جګړه نن له غرمې مخکې هغه وخت ونښته چې پوځيانو د وسله والو طالبانو په يوه پټنځي بريد وکړ .
د روزګان ولايت د سيمه ييزو پوليسو يو قوماندان وايي: په دې جګړه کې نهه تنه وسله وال طالبان ووژل شول .
دغه راز د وسله والو طالبانو د جنګي وسايلو درې ډيپوګانې د ترينکوټ ښارته څېرمه او د دهراوود او چهارچينو په ولسواليوکې کشف شوې دي.
ويل کيږي له دغو ډيپوګانوڅخه په لسګونو سپکې او درندې وسلې ترلاسه شوې دي.
0 1 دقیقه لوستل