کابل، د زمري ۱۷ مه، باختر
د روزګان د کرنې، اوبو لګولو او مالدارۍ ریاست مسوولین په دغه ولایت کې د ۱۲ سړو خونو د رغولو خبر ورکوي.
د یاد ولایت د کرنې، اوبو لګولو او مالدارۍ ریاست مطبوعاتي مسوولینو د باختر آژانس سيمه ييز خبريال ته وويل، چې د دغه ولایت په مرکز ترینکوټ کې ۱۲ سړې خونې د ۶ میلیونو افغانیو په لګښت جوړې او ګټې اخیستنې ته سپارل شوې دي.
هغه زیاته کړه، چې هره سړه خونه کې د ۱۶ ټنو پیازو د ځایولو وړتيا لري.
د یادونې وړ ده چې مخکې له دې هم په یاد ولایت کې دې ته ورته پروژې پلې شوې دي.
