کابل، د وږي ۲ مه، باختر
د غور په مرکز فېروز کوه ښار کې د ۶ سوه متره په اوږدوالي سره د یوه سړک، ۵ پلګوټو او د څه باندې ۶۰۰ متره په اوږدوالي د یوې ویالې د جوړولو چارې پیل شوې.
د فېروزکوه ښاروال مولوي امین الله شریفي د باختر آژانس سیمه ییز خبریال ته وویل، چې یاد سړک د ښاروالۍ له لوري د ۱۱ میلیونو افغانيو په لګښت د ۶۰۰ متره په اوږدوالي او ۱۳ متره سور سره په اساسي ډول رغول کېږي.
د مسوولینو په خبره د دغه سړک ترڅنګ ۱۸۰متره استنادي دېوال، ۵ پلګوټي او ۶۴۶ متره کانکریټي ویاله هم رغول کېږي.
د یادونې وړ ده، چې د دغه ولايت د ټولګټو رياست له لوري د ٢٠ ميليونو افغانيو په لګښت د غور- کابل د لويې لارې په اوږدو کې د فيروزکوه ښار ختيځ لوري ته د ٤٢ کيلو متره په اوږدوالي د یو سړک د جوړولو چارې هم پیل روانې دي.
