کابل، د لېندۍ ۲۸مه، باختر
د مزارشریف ښار د نهمې ناحیې اړوند د دشت شور سړک په ۱۳ کوڅه کې د مزارشریف ښاروالۍ لخوا د اوبو کانال د جوړېدو چارې پیل شوې.
د مزارشریف ښار د انجنیرۍ برخې مسول انجنیر محمد هاشم هاشم وایي چې د اوبو دغه کانال ۵۷۵ متره اوږدوالی لري، چې په وینا یې د ۱ میلیون او ۴۰۰ زره افغانیو په ارزښت د مزار ښاروالۍ لخوا جوړېږي.
نوموړی وایي چې د اوبو یاد کانال به په اساسي توګه جوړېږي، چې په دې سره به د ژمي په موسم کې د سیمې د خلکو بنسټیزې ستونزې حل شي.
په همدې حال کې د قراردادي شرکت مسول وایي چې دا کانال به د مزار ښاروالۍ انجنیرانو تر څار لاندې په معیاري ډول جوړوي.
دغه پروژه په داسې حال کې ترسره کېږي، چې په تېرو وختونو کې به د دغې سیمې اوسېدونکي د بارانونو د زیات ورښت پر مهال د اوبو کانال له نشتون څخه کړېدل.
فیصل، فغانمل
