کابل / باختر د تلې د مياشتې ١٥ :
د ملي اردو لوى درستيز نن د اردو له جګپوړو مسوولينو سره په يوه کاري غونډه کې د هېواد د امنيتي حالت د څيړنې په ترڅ کې خلکو ته ډاډ ورکړ چې ملي اردو اجازه نه ورکوي چې د هېواد دښمنان هېواد د بې ثباتۍ لوري ته يوسي.
د ملي دفاع وزارت مطبوعاتي دفتر باختر آژانس ته خبر ورکړ:
جنرال قدم شاه شهيم چې د ملي اردو د جګپوړو مسوولينو په کاري غونډه کې خبرې کولې؛ د دغو مسوولينو د کاري رپوټونو د اوريدو په ترڅ کې ټينګار وکړ: د لوژستيکي او تسليحاتي موادو په ګډون د اکمالاتو بهير دې په مطلوب ډول عملي شي.
ده د ملي ارزښتونو ددفاع، دهېواد ددښمنانو په وړاندې دمقاومت او دتروريستي توطيو د شنډولو په لاره کې د ملي اردو د ميړنيو منسوبينو د کړو وړو د ستايلو په ترڅ کې خلکو ته ډاډ ورکړ چې ملي اردو نه پريږدي دښمنان، هېواد د بې ثباتۍ لوري ته يوسي .
