کابل، د سلواغې ۱۲مه، باختر
د ننګرهار د کرنې، اوبولګولو او مالدارۍ ریاست مسوولین وایي، چې د دغه ولایت په بهسودو ولسوالۍ کې د خوړو نړیوال پروګرام په مالي ملاتړ د ۴.۵ میلیونو افغانیو په لګښت د یوه زابر د بیا رغولو او پاک کارۍ چارې پیل شوې دي.
ننګرهار کرنې، اوبولګولو او مالدارۍ ریاست مسوولینو د باختر آژآنس سیمه ییز خبریال ته وویل، چې دغه زابر د بهسودو ولسوالۍ په ګلبهار کلي کې د خوړو نړیوال پروګرام په مالي ملاتړ د ۴.۵ میلیونو افغانیو په لګښت پاک کاري او بیا رغول کېږي، چې په کې ۱۹۲ مترو په اوږدوالي د زابر رغول او د ۳ زره ۲۴۰ مترو په اوږدوالي د زابر د پاک کارۍ چارې شاملې دي.
د مسوولینو په وینا، په دغه پروژه کې ۲۴۷ تنو ته د کار زمینه برابره شوې، چې چارې به یې د ۹ میاشتو په موده کې بشپړې شي.
د یو بل خبر له مخې؛ د خوست په علیشېرو ولسوالۍ کې د خادمې کانال پروژې چارې د اړیکو دفتر په مالي ملاتړ ۱۴ میلیونه افغانیو په لګښت پیل شوې.
دغه کانال د ۱۳۷۵ مترو په اوږدوالي رغول کېږي، چې ۱۳۲۰ جریبه کرنیزه ځمکه به خړوبه کړي او ۶۳۰ کورنۍ به ترې ګټه واخلي.
لمر
