خبرونهورزش

په هلمند کې د کرکټ شل اوریزې سیالۍ پيل شوې

 کابل، د چنګاښ ۷ مه، باختر

د هلمند په مرکز لښکر ګاه کې نن د کجکي جام تر عنوان لاندې؛ د دغه ولایت په کوربتوب د کندهار، هرات او غزني ولایتونو  تر منځ د کرکټ شل اوریزي سیالۍ پیل شوې.

د هلمند ولایت د کرکټ بورډ آمر جانان فولادوال  باختر آژانس ته وویل، چې یادې ۲۰ اوریزې سیالۍ د  څلورو ولایتونو لوبغاړو ترمنځ پيل شوې چې څلور ورځې به دوام وکړي. په خبره یې، لومړۍ لوبه نن د هلمند او کندهار لوبډلو ترمنځ پيل شوې ده.

د هلمند د کرکټ اکاډمۍ روزونکی عبدالرحمن ناصري وايي، چې د دغو سیالیو موخه  ورزش ته د ځوانانو هڅول دي.

ناصري له لوړ پوړو مسؤلینو غوښتنه وکړه چې همکاري ورسره وکړي چې تکړه لوبغاړي په نښه او د هېواد په کچه لاسته راوړنې ولري.

لوبغاړو د دې سیالۍ په ترسره کېدو خوښي وښوده او زیاته یې کړه چې د دغه ډول سیالیو ترسره کېدل به يې وړتیاوې لا لوړې کړي.

دا په داسې حال کې ده چې د اسلامي امارت په واکمنېدو سره د ورزش برخې ته پاملرنه ډېره شوې ده.

س.صدیقي

دوام

ورته لیکنې

دکمه بازگشت به بالا