په پلازمېنه کې د يوه سړک د بيارغولو چارې پیل شوې

کابل، د غوايي ۲۲مه، باختر
کابل ښاروالۍ په پلازمېنه کابل ښار کې د يوه سړک د بيارغولو چارو د پيل خبر ورکړی دی.
سرچينې د يوې خبرپاڼې په خپرولو سره ويلي، چې د ښار اړوند د ۵ ناحيې د سپین کلي څلورلارې لوېدیځ لوري ته د سړک د بیارغولو چارې پیل شوې دي.
په خبرپاڼه کې د کابل ښاروالۍ د سړکونو د بیارغولو آمر انجنیر شریف الله قادري له قوله ويل شوي، چې ياد سړک به د څه باندې یو کیلو متر په اوږدوالي او ۷ مترو په سور په معیاري توګه بیا ورغول شي.
کابل ښاروالۍ همدارنګه زياته کړې، چې د دغه سړک یو شمېر برخې د وخت په تېرېدو ویجاړې شوې وې، چې له تخنیکي او فني مطالعاتو وروسته یې د پرمختللې ماشینرۍ په وسیله د بیارغونې چارې پیل شوې دي.
هېره دې نه وي، چې کابل ښاروالۍ ډاډ ورکړی؛ هغه سړکونه چې بیارغونې ته اړتیا لري، یو پر بل پسې به بيا ورغول شي.
افغانمل