۲۲– کابل، د غوايي ۲۵مه، باختر
کابل ښاروالۍ په پلازمېنه کې د یوه فرعي سړک جوړولو چارو د پیل کېدو خبر ورکړی دی.
سرچینې د یوې خبرپاڼې په خپرولو سره ويلي، چې د ۱۶مې ناحیې د۲۶ م ګذر اړوند د الوخیلو سیمې د فرعي سړک د جوړولو چارې، د کابل ښاروالۍ له لوري او د ملګروملتونو د پروژوي خدمتونو دفتر(UNOPS) په مرسته پیل شوې.
د خبرپاڼې د مالوماتو له مخې دغه سړک ۶۰۰ متره اوږدوالی او ۶ متره سور لري چې د راتلونکې یوې میاشتې په اوږدو کې به په معیاري ډول جوړ شي.
کابل ښاروالۍ همدارنګه ويلي، چې د دغې پروژې په پلي کېدو سره به له یوه لوري يو شمېر هېوادوالو ته د کار زمينه برابره او له بلې خوا به د سيمې د اوسېدونکو پر وړاندې پرتې موسمي ستونزې لرې شي.
افغانمل
