کابل، د وږي ۲۱مه، باختر
د کورنیو چارو وزارت په پلازمېنه کې د ځانګړو امنيتي ځواکونو د تېرې شپې په عملیاتو کې د ۴ انسان تښتوونکو د وژل کېدو خبر ورکړی دی.
یاد وزارت په خپله اکس پاڼه ليکلي، چې (د کورنیو چارو وزارت اړوند ځانګړو ځواکونو لويې قوماندانۍ د یو لړ کشفي او اوپراتیفي معلوماتو پر بنسټ د کابل ښار ۸مې حوزې کارته نو سیمه کې عملیات ترسره کړل.)
سرچینې زیاته کړې، چې د یادو عملیاتو موخه د یو تن هېوادوال د ژغورل، چې څو ورځې وړاندې د انسان تښتوونکو يوې ډلې د کابل ښار له کارته نو سیمې تښتولی وو.
د کورنیو چارو وزارت همدارنګه ويلي، (چې د یاد تښتول شوي کس د خلاصون عملیات تېره شپه په ١ نيمه بجه پیل شول، چې نږدې د شپې په ۲ بجو او ۱۵ دقيقو پای ته ورسيدل په دغو عملياتو کې سړي تښتوونکو له امنيتي ځواکونو سره وسله واله نښته وکړه، چې په پایله کې د یادې ډلې ٤ غړي ووژل شول.)
سرچینې زیاته کړې، چې تښتول شوی هېوادوال په داسې حال کې امنیتي ځواکونو ته په لاس ورغی، چې انسان تښتوونکو په شهادت رسولی وو.
