ترينکوټ باختر د غبرګولي د مياشتې ۱۳ مه
د روزګان ولایت سیمه ییز امنیتي چارواکې وايي چې وړمه شپه د دغه ولایت د مرکز ترینکوټ اړوند سیمو کي د بهرنیوځواکونو په هوايي بریدونو کې د یو طالب قوماندان په ګډون ۲۵ تنه وسله وال طالبان وژل شوي دي.
د روزګان ولايت د امنیه قومنداني د لومړي کنډک قومندان زین الله «ملک» باختر اژانس ته وویل چې وړمه شپه بهرنیو هوايي ځواکونو ددغه ولایت په مرکز ترینکوټ کې د وسله والو طالبانو یو شمیر مرکزونه په نښه کړي چې له امله يې د وسله والو طالبانو د یوه قوماندان په ګډون پنځه ویشت تنه وسله وال طالبان وژل شوي او شل تنه نور ټپيان دي.
ملک زياتوي چې دغه راز په دغو بریدونو کې د وسله والو مخالفينو د لس ګونو وسايطو په ګډون اتلس موټرسایکلونه هم له منځه وړل شوي دي.
