کابل، د وږي۱۱مه، باختر
یو شمېر کورنیو او بهرنیو خبری سایټونو په خپلو نننیو خپرونو کې د سیمې او نړۍ د حالاتو ترڅنګ د افغانستان حالات هم څېړلي دي.
د باختر آژانس خبریال د دغو سایټونو پر خپرونو کتنه تر سره کړې او دغه راپور یې چمتو کړی دی.
د اسپوتنیک خبري سایټ (حسن کاظمي قمي واشنګټن په افغانستان کې د داعش د فعالیت په زیاتولو تورن کړ) تر عنوان لاندې لیکلي دي.
د افغانستان لپاره د ایران ځانګړي استازی حسن کاظمی قمی ویلي: امریکا په افغانستان کې د داعش د فعالیتونو د زیاتېدو مسوول دی او د هغوی موخه د ایران، روسیې او چین لپاره د ستونزو رامنځته کول دي.
د طلوع نیوز خبري سایټ ( انس حقاني په خوست کې: د اسلامي امارت غېږه له نړۍ سره د تعامل لپاره خلاصه ده ) تر عنوان لاندې لیکلي دي.
انس حقاني چې د اسلامي امارت له جګپوړو غړو څخه دی په خوست کې له جګړو څخه د پاتې شویو پوځي تجهیزاتو په نندارتون کې وویل، چې د اسلامي امارت غیږه له نړۍ سره د تعامل لپاره خلاصه ده.
د اطلاعات روز خبري سایټ (د افغانستان اسلامي امارت د کورنیو چارو وزارت؛ د هېواد د امنیت د لاټينګښت لپاره امنیتي کمرې لګول اړين دي ) تر عنوان لاندې لیکلي دي.
د بخښنې نړیوال سازمان اندېښنو ته د اسلامي امارت ځواب: د امنیت لپاره د امنیتي کمرو نصبول اړین دي.
د افغانستان د اسلامي امارت د کورنیو چارو وزارت په کابل ښار کې د امنیتي کمرو د نصبولو په اړه د بښنې نړیوال سازمان د اندېښنو په غبرګون کې ویلي، چې امنیتي کمرې نه یوازې په افغانستان کې بلکې د نړۍ په ټولو ښارونو او پلازمېنو کې یوه عامه خبره ده.
