کابل/ د کب ٢٥ مه / باختر
د اسلامي امارت کابینې په نننۍ غونډه کې د افغان شخصیتونو د راستنېدو او اړيکو لپاره د کمیسیون د جوړولو طرحه تصویب کړه.
د باختر آژانس د خبرله مخې؛ د دغه کمیسیون د جوړېدو موخه هېواد ته د افغان شخصیتونو د راستنېدو لپاره لاره هوارول دي.
د کابینې د پرېکړې له مخې د دغه کمېسیون مشري به مولوي شهاب الدین دلاور کوي.
دغه راز د اسلامي امارت کابینې د تعدیلاتو په نظر کې نیولو سره د مدافع وکیلانو د همغږۍ مقرره هم تصویب کړه.
کابینې دغه راز اقتصادي کمېسیون ته دنده وسپارله چې د ځانګړو اقتصادي زونونو د جوړولو په اړه د صنعت او سوداګرۍ وزارت پر وړاندیز غور وکړي او پایله یې د کابینې راتلونکې غونډې ته وړاندې کړي.
د کابینې غونډې همدا راز پرېکړه وکړه، چې په موټرو کې د اسلامي امارت د مشرانو د تصويرونو له لګولو دې ډډه وکړي.
په دې غونډه کې د ځمکني ټرانسپورټ په برخه کې شته ستونزې او د ترانسپورتي شرکتونو وړاندیزونه هم وڅېړل شول.
د اسلامي امارت کابينې له هر اړخیزو بحثونو وروسته د ځمکني ټرانسپورټ د ستونزو د حل په موخه د اړوندو ارګانونو له استازو څخه یو پلاوی وټاکه.
\ ذ
