کابل، د چنګاښ لومړۍ، باختر
د بغلان د نفتي توکو مسوولین وايي چې په دغه ولایت کې د تېلو او اوبلن ګازو د ادارې عوايد ۷۷ سلنه زيات شوي دي.
د بغلان د نفتي توکو او اوبلن ګازو لوی مدير قاري نصرت الله د باختر آژانس سيمه ييز خبريال غلام علي علمى ته وويل چې د دغه ولایت د نفتي توکو او د اوبلن ګازو د لوی مدیریت کارکوونکو په هڅو سره په تېرو ۹ میاشتو کې د ټانکونو د تېلو د پلور او د جایدادونو د کرایې اخیستلو له درکه څه د پاسه ۱۷ میلیونه ۷۳۰ زره افغانۍ عواید ترلاسه شوي، چې د تېر کال په پرتله څه د پاسه ۱۰ میلیونه ۲۸۳ زره افغانۍ په تېرو لسو میاشتو کې راټول کړای شوي وو، چې ۷۷ سلنه زیاتوالی ښيي.
هغه زیاته کړه، چې د اسلامي امارت په بریالیتوب سره د تېلو په ټانکونو کې د تېلو د پلورنې د کمیشن په راټولولو کې د شفافیت په تامینولو برسېره په ټانکونو کې د تېلو پلورنې د غلا مخنیوی هم شوی دی.
د هغه د څرګندونو له مخې، د تېلو په پلورلو کې د شفافیت د تامنیولو په مقصد د تېلو د ټانکونو ټولو مسوولینو ته لارښونه شوې، چې په خپلو ټانکونو کې دې د نوي لیټر سنجی د اندازه کولو وسایل ولګوي.
په همدې حال کې د ټانکونو د خاوندانو اتحادیې رئیس حاجي معصوم د تیلو د پلورنې د کمیشن په راټولولو کې د شفافیت په تاییدولو سره د تېلو په ټولو ټانکونو کې د لېټري اندازه کولو د وسایلو لګول مهم وباله.
ع