کابل باختردزمري دمياشتې١٥ :
د ننګرهار ولايت په مرکز جلال آباد ښار کې دبم دچاودنې له امله يو ماشوم شهيد
او دوه تنه نور ټپيان شول .
دغه چاودنه نن له غرمې مخکې د يوولسو بجو په شاوخوا کې د جلال آباد ښار د تلاشي په کولايي کې هغه وخت وشوه چې دپوليسو څو تنه سرتيري او ملکي وګړي په سيمه راټول شوي وو.
د ننګرهار د والي ويندوي احمد ضيا عبدالزي باختر آژانس ته وويل :
په دې چاودنه کې يوماشوم شهيد او يو ملکي وګړې او د پوليسو يو سرتيرې ټپيان شول.
عبدالزي وسله وال طالبان د دغه بمي بريد مسوول وبلل او ويې ويل ، چې امنيتي مامورينو ددغې خونړي پيښې دعاملينو د پيژندلو او نيولو لپاره پلټنې پيل کړې دي .
په همدې حال کې د جلال ښار په ملکي روغتون کې ډاکترانو ديو تن ټپي روغتيايي حالت خراب بللي دى.
د جلال آباد ښار په دې وروستيو وختو کې د پرله پسې ترورستي پيښو ډګر دى.
د هند په قونسلګري د ځان مرګو يرغلګرو بريد ، د ايستيناف څارنوالي په رييس ناوړه قصد او دچاودنې درې نورې پيښې يوازې د اوو ورځو په بهير کې په جلال آباد ښار کې دترورستي پيښو د زياوالي ډګر دى هغه پيښې چې د ماشومانو په ګډون دملکي وګړو دمرګ ژوبلې سبب شوى دي .