کابل باختر د زمري څوارلسمه :
دافغانستان داسلامي جمهوريت جمهور رييس حامدکرزى د ايران د منتخب جمهور رييس ډاکترحسن روحاني د لوړې په مراسموکې له ګډون وروسته، تيره شپه هيواد ته راستون شو .
دجمهور رييس د ويندوى دفتر باخترآژانس ته خبر ورکړ: د هيواد جمهور رييس او ملګرى هيئت يې پرون مازيګر د ايران د منتخب جمهور رييس ډاکتر حسن روحاني د لوړې په مراسموکې چې په تهران ښارکې دايران داسلامي شورا په مجلس کې پرځاى شول؛ ګډون وکړ .
په دغو مراسموکې دافغانستان داسلامي جمهوريت دجمهور رييس په ګډون سربيره، د نړۍ د څه دپاسه پنځه پنځوسو هيوادونومشرانو او جګپوړو مقاماتو برخه لرله .
په پيل کې د ايران داسلامي جمهوريت داسلامي شورا رييس او د قضاييه قوې رييس ويناوې وکړې، وروسته ډاکتر حسن روحاني د ايران داسلامي جمهوريت د اووم جمهور رييس په توګه ددغه هيواد د قضاييه قوې د رييس په وړاندې د لوړې مراسم پرځاى کړل .
دلوړې مراسمو وروسته ډاکتر روحاني وينا وکړه او وې ويل چې د (تدبير او اميد دولت) به د اعتدال لاره غوره کړي او خپلوخلکو ته دسوکالۍ اوښه او پتمن ژوندانه په لاره کې به هڅه اوهاند وکړي او د فساد او تبعيض په وړاندې به مبارزه وکړي .
ډاکتر روحاني دخپل دولت دبهرني سياست په باب وويل چې د ايران داسلامي جمهوريت په سيمه کې د سولې او ثبات د تامينولو په لټه کې دى او د هيوادونو د پولو دبدلون مخالف دى .
ده ټينګار وکړ چې په اوسنۍ نړۍ کې هيڅ قدرت نه شي کولاى خپل امنيت د وحشت او د نورو د نا امن کولو له لارې ترلاسه کړي .
د وينا په پاى کې ده دخپلې پيشنهادي کابينې د اسلامي شورا له مجلس څخه د باور د رايې د ترلاسه کولو په لاره کې د وزيرانو نومونه او دحکومت تګلاره ددغه مجلس رييس ته وړاندې کړه .
دافغانستان داسلامي جمهوريت جمهور رييس حامدکرزي د لوړو مراسمو وروسته تېر ماښام د ايران داسلامي جمهوريت له جمهور رييس ډاکتر حسن روحاني سره وکتل .
په دې کتنه کې چې د تهران په سعدآباد ماڼۍ کې ترسره شوه؛ د ايران جمهور رييس له دې امله چې دافغانستان داسلامي جمهوريت جمهور رييس او ملګرى هيئت يې د روژې په مبارکه مياشت کې د ده د لوړې په مراسموکې دگډون لپاره ايران ته سفر وکړ، مننه وکړه او د مبارکى د هغه پيغام له امله يې هم کورودانۍ ووايه چې د ده د انتخاب په مناسبت دحامدکرزي له خوا ليږل شوى و.
ډاکتر حسن روحاني په دې کتنه کې وويل چې ايران او افغانستان ګډ تاريخ درلود او د دغو دواړو هيوادونو اوس او راتلونکي هم ګډ دي او د دغو دواړو هيوادونو ترمنځ د اړيکو اوهمکارۍ د پراختيا ښې زمينې شته .
په مقابل کې دافغانستان داسلامي جمهوريت جمهور رييس حامدکرزي وويل چې دافغانستان دخلکو دجهاد په دوران کې له ايران سره زموږ اړيکې دوستانه او ښې وې او د ايران حکومت اوخلکو افغان مهاجرينو ته هرکلي ووايه چې موږ له دې امله مننه کوو .
دهيواد جمهور رييس وويل چې د ايران خلکو د خپل جمهور رييس دلوړې په نننيو مراسموکې خپل ولسواک نظام نندارې ته وړاندې کړ .
ددغې کتنې په پاى کې دواړو لورو څرګنده کړه چې د دواړو هيوادونو ترمنځ زياتې مسئلې شته چې بايد ورباندې خبرې وشي او په دې برخه کې دې ته اړتيا ده چې د دواړو هيوادونو دمشرانو ترمنځ تفصيلي ليدنې کتنې او خبرې اترې وشي .
ديادونې وړ ده چې ډاکتر حسن روحاني د ايران دجمهوري رياست په انتخاباتو کې چې د روان کال دغبرګولي دمياشتې په وروستيو وختوکې ترسره شول؛ په سلوکې دپنځوس اعشاريه اوو رايو په ترلاسه کولو سره په رسمي ډول د ايران د اووم جمهور رييس په توګه انتخاب شو .