کابل باختر 19 جدی
جاوید لودین معین سیاسی وزارت امور خارجه امروز با نظام الدین زاهدوف معین سیاسی وزارت خارجه جمهوری تاجیکستان در مقر وزارت امور خارجه ملاقات کرد.
به اساس معلومات دفتر سخنگوی وزارت امور خارجه به آژانس اطلاعاتی باختر، در این ملاقات لودین ضمن یادآوری از روابط دیرینه و دوستانه میان افغانستان و تاجیکستان گفت،" رابطه واقعاً" نزدیک قلبی و عاطفی بین دو ملت افغانستان و تاجیکستان وجود دارد، رابطه یی که در تاریخ، احساسات و دوستی محکم مردم دو کشور ما ریشه دارد."
لودین اضافه کرد که" آمادگی های که تابه امروز در ارتباط تدویر موفقانه پنجمین کنفرانس ریکا یا کنفرانس همکاری های اقتصادی منطقوی در مورد افغانستان انجام شده خیلی سازنده و مفید بوده است . "می خواهیم در این ارتباط نیز از همکاران خویش به وزارت امور خارجه تاجیکستان و دیگر ادارات حکومت تاجیکستان اظهار سپاس نماییم. "
در مقابل زاهدوف معین سیاسی وزارت امور خارجه تاجیکستان گفت،" تاجیکستان بیش از هر کشور دیگر خواستار پایداری صلح و ثبات در افغانستان می باشد، پایداری صلح و ثبات در افغانستان، پایداری صلح و ثبات در تاجیکستان و منطقه می باشد."
موصوف اضافه کرد،" ما رشد و پیشرفت تاجیکستان را در پیوست با رشد و پیشرفت در افغانستان دانسته و برگزاری جلسه چهارم کمیسیون مشترک همکاری های افغانستان و تاجیکستان در کابل، را بیانگر دوستی دوکشور می خوانیم."
قرار است پنجمین کنفرانس همکاری های اقتصادی – منطقوی ریکای پنج برای افغانستان در بهار سال آینده هجری شمسی به میزبانی جمهوری تاجیکستان به اشتراک بیش از هفتاد کشور و سازمان بین المللی در شهر دوشنبه برگزار گردد.
به اساس یک خبر دیگر:
از هفته تصویب قانون اساسی در وزارت امور خارجه تجلیل به عمل آمد.
در محفلی که به این مناسبت ترتیب یافته بود، داکتر زلمی رسول وزیر امور خارجه، قاضی گل رحمن رئیس کمیسیون نظارت بر تطبیق قانون اساسی و داکتر فرامرز تمنامعاون سخنگوی وزارت امور خارجه به تفصیل پیرامون موضوع صحبت کردند.
