کابل باختر د ثور دريمه :
د وسله والو طالبانو د يو سرګروپ په ګډون شپږ تنه وسله وال طالبان د فارياب ولايت په بلچراغ ولسوالۍ کې ووژل شول .
د فارياب ولايت دامنيې قوماندانۍ وياند عبدالکريم يورش باختراژانس ته وويل چې دغه وسله وال طالبان د فارياب ولايت د بلچراغ ولسوالۍ د ايشکي درې په سيمه کې د افغان ځواکونو سره په جګړه او هوايي بريدونوکې ووژل شول .
په وژل شويو کسانو کې د وسله والو طالبانو ديو مشهور سيمه يېز سرګروپ په جند الله مشهور قاري شمس الله هم شامل دى .
يورش زياته کړه په دې پيښه کې پنځه تنه نور وسله وال طالبان ټپيان شول .
هغه وويل چې په دې جګړه کې يو افغان سرتيرى هم شهيد او يوبل سرتيرى ټپي شوى دى .
د يوبل خبرله مخې ، يو وسله وال طالب د فارياب ولايت دغورماچ ولسوالۍ په مربوطاتو کې په واټ کې دماين دښخولو په وخت کې ووژل شو او دوه تنه نور وسله وال طالبان ټپيان شول .
دفارياب ولايت دامنيې قوماندانۍ وياند وويل چې د دغه ماين ښخوونکي طالب مړى اوس هم په سيمه کې پاتې دى او دپيژندلو وړ نه دى . ختم_ ج _ اکرم
0 1 دقیقه لوستل