کابل/ د مرغومي ۱۸مه/ باختر
د افغانستان د اسلامي جمهوریت جمهوررئیس محمد اشرف غني ننګرهار ولایت ته د خپل سفر پر مهال د یاد ولایت په ولایت مقام کې جوړې شوې لویې ولسي غونډې ته وینا وکړه. په دې غونډه کې چې د جمهوري ریاست لومړي مرستیال امرالله صالح، د ملي امنیت سلاکار ډاکتر حمدالله محب، د مشرانو جرګې رئیس فضل الهادي مسلمیار، د چارو ادارې عمومي رئیس فضل محمود فضلي، د ملي دفاع وزارت لوی درستیز سترجنرال محمد یاسین ضیا او د کابینې یو شمېر وزیرانو هم حضور درلود، په پیل کې د ننګرهار والي ضیاالحق امرخېل جمهوررئیس او مل پلاوي ته د ښه راغلاست ترڅنګ وویل، د دې ولایت د امنیت په تامین کې ولسونو اساسي رول لوبولی دی، ځکه د خلکو او ولایت مقام ترمنځ فاصله له منځه وړل شوې ده. د ننګرهار والي زیاته کړه، د ولسونو لویه غوښتنه د امنیت تامین، د اصلاحاتو تطبیق او د ښې حکومتولۍ پیاوړي کول دي. نوموړي همدا راز د ښوونکو د کموالي، برېښنا، پوهنتون او روغتونونو ستونزو ته د رسېدنې غوښتنه هم وکړه. په یاده غونډه کې احمد علي حضرت د ننګرهار د ولایتي شورا، امیر خان یار په ولسي جرګه کې د ننګرهار د خلکو د استازو، مولوي محمد داوود د علماوو او ذبیح الله زمري د قومي متنفذینو په استازیتوب خبرې وکړې او د ولسوالیو او لویو لارو امنیت ته د پاملرنې، د ښوونکو او پولیسو تشکیل د زیاتوالي، د ځوانانو د ګومارنې، د هوایي ډګر د ځغاستلیکې د رغاونې، د علمای کرامو غوښتنو ته د رسېدنې، ننګرهار پوهنتون د استملاک ستونزې د حل، د کابل ـ جلال اباد او د جلال اباد ـ تورخم دویم سړک جوړولو او هدفي وژنو د مخنیوي په اړه خپلې غوښتنې له جمهوررئیس سره شریکې کړې. وروسته د جمهوري ریاست لومړي مرستیال امرالله صالح د هیواد د امنیتي او دفاعي ځواکونو د شهیدانو روح ته د دعا پر مهال د ننګرهار د امنیت په تامین کې د ولسي پاڅون کوونکو هڅې او قربانۍ وستایلې. امرالله صالح د سولې روانو مذاکراتو ته په اشارې وویل، د سولې په خبرو کې په جمهوریت، بیرغ او د ښځو پر حقونو معامله نه شي کېدای، زموږ شرط دا دی چې زعامت به د ټاکنو له لارې ټاکل کېږي. جمهوررئیس غني د ګډونوالو د خبرو له اورېدو وروسته وویل، د ننګرهار ولسونه دې د ولسوالانو او رئیسانو د بدلون طرحه په همغږۍ برابره او ماته وسپاري، ترڅو تطبیق یې کړو. د هیواد جمهوررئیس پوهنې وزارت ته لارښوونه وکړه چې ننګرهار ولایت ته څلور زره بستونه ورکړي او په معارف کې د اصلاحاتو لپاره دې واضح طرحه ترتیب شي. جمهوررئیس د ننګرهار سوداګریز او ترازیټي ارزښت ته په اشارې وویل، په تورخم شل میلیونه ډالره پانګونه کوو او حکومت به د برېښنا په برخه کې پانګه والو ته لازمې اسانتیاوې برابرې کړي. جمهوررئیس د غونډې په پای کې د داعش او نورو تروریستي ډلو پر وړاندې د ننګرهار د خلکو مبارزه بېسارې وبلله وې ویل، دا زموږ مسوولیت دی چې ولسونه ثبات ته ورسوو او طالبان دې نننی افغانستان درک کړي.
