کابل / د تلې ۱۳مه / باختر
د اطلاعاتو او فرهنګ وزارت سرپرست ملا خیرالله خیرخواه نن د افغانستان لپاره د ملګرو ملتو سازمان د سرمنشي له ځانګړې استازې دیبورا لیونز سره د خپل کار په دفتر کې وکتل.
د باختر آژانس خبریال د خبر له مخې؛ په دې کتنه کې دواړو لوریو د دوه اړخیزو اړیکو او همکاریو په اړوند خبرې وکړې.
د کتنې په پیل کې مېرمن دیبورا لیونز په افغانستان کې د ملګرو ملتو سازمان د فعالیتونو په اړه معلومات ورکړل او ویې ویل چې دغه سازمان په روغتیا، پوهنې، تحصیل، کرنې، بشري مرستو او نورو مهمو برخو کې کار کوي او څرګنده یې کړه چې دغه نړیوال سازمان د پخوا په شان په بېلابېلو برخو کې له افغانستان سره مرستې او همکارۍ ته چمتو دی.
د افغانستان لپاره د ملګرو ملتو سازمان د سرمنشي ځانګړې استازې ډاډ ورکړ چې د سیمې او نړۍ له هېوادونو سره تماس نیسي او د افغانستان د ملاتړ په خاطر د دغه هېواد پرمختګونه او ستونزې له هغوی سره شریکوي.
دغه راز په دې کتنه کې د اطلاعاتو او فرهنګ وزارت سرپرست ملا خیرالله خیرخواه هم له افغانستان سره د ملګرو ملتو سازمان د مرستو او همکاریو مننه او قدرداني وکړه او د دواړو لوریو ترمنځ یې پر دوه اړخیزو اړیکو او همکاریو ټینګار وکړ.
خیرخواه وویل چې د افغانستان اسلامي امارت پالیسي دا ده چې ستونزې د تفاهم او خبرو له لارې حل شي، نه د زور او فشار له لارې.
هغه زیاته کړه چې نړۍ دې له افغانانو سره مرسته او همکاري وکړي، خو دوی باید پرېښودل شي چې په خپله تصمیم ونیسي.
د ملا خیرالله خیرخواه په خبره؛ اوس په افغانستان کې د فساد کچه صفر ته راټیټه شوې ده او نړیوال کولای شي په بشپړ ډول خپل فعالیتونو او همکاریو ته دوام ورکړي.
همدارنګه د اطلاعاتو او فرهنګ وزارت سرپرست، څرګنده کړه چې د افغانستان اسلامي امارت د خلکو د هوساینې لپاره کار کوي او غواړي افغانانو ته د ژوندانه ښه شرایط برابر کړي.
د کتنې په پای کې دواړو لوریو په بېلابېلو برخو کې پر ګډو همکاریو ټینګار وکړ.
وهاج
