کابل/ د غویي لومړۍ/ باختر
د افغانستان اسلامي جمهوریت جمهور رئیس محمد اشرف غني نن مازیګر د استونیا له جمهوررئیسې مېرمن کرستي کالیولایډ سره چې د دغه هیواد د لوړ پوړي پلاوي په مشرۍ په رسمي سفر کابل ته راغلې وه، وکتل.
په دغه کتنه کې چې په ارګ کې وشوه، د جمهوري ریاست مرستیالانو، د بهرنیو چارو او کابینې یو شمېر وزیرانو، د چارو ادرې لوی رئیس، د جمهوري ریاست د عامه او ستراتېژيکو اړیکو ادارې رئیس او د افغانستان بانک سرپرست هم حضور درلود.
د دواړو هیوادونو جمهوررئیسانو د افغانستان او استونیا تر منځ د اړیکو د پراختیا، له افغانستان څخه د امریکا متحدو ایالاتو ځواکونو د وتلو پرېکړې او د افغانستان او بین المللي ټولنې او ناټو سازمان غړو هیوادونو ترمنځ د مناسباتو د نوي فصل په اړه بحث او خبرې وکړې.
جمهوررئیس غني اغلې کرستي کالیولایډ او مل پلاوي ته د ښه راغلاست ترڅنګ، له افغانستان سره په بېلابېلو برخو کې د استونیا د مرستو او همکاریو او د غوڅ ملاتړ ماموریت په چوکاټ کې د دغه هیواد ځواکونو د فعالې ونډې، مننه وکړه.
د هیواد جمهوررئیس وویل: موږ د اړیکو په نوي فصل کې له افغانستان سره په بېلابېلو په ځانګړي ډول د دیجیټل کولو په برخه کې چې مخکې پیل شوی، د استونیا د لازیاتې همکارۍ غوښتنه کوو.
په پای کې د استونیا جمهوررئیسې له افغانستان سره د استونیا د پیاوړو او غښتلو اړیکو د دوام ډاډ هم ورکړ.
