خبرونهامنیت

په بلخ کې د هدفي وژنو اصلي عامل ووژل شو

کابل / د وري ۲۷ مه / باختر

پوځيانو په بلخ کې د وروستيو هدفي وژنو د اصلي عامل د وژل کېدو خبر ورکړ.

په بلخ کې د وسله والو طالبانو د استخباراتو مسوول ملا اجمل ماشک تېره شپه د بلخ ولسوالۍ په حسين خېلو کلي کې د هوايي ځواکونو په بريد کې ووژل شو.

ملا اجمل ماشک په بلخ کې په وروستيو مياشتو کې د هدفي وژنو اصلي عامل، له هغې جملې د ملي اردو د ښځينه سرتېرو د سپرلۍ پر موټر او د شاهين قول اردو            د رييس ډاکټر صالح محمد صميم پر موټر د بريدونو عامل و.

په دغه بريد کې ٨ نور وسله وال طالبان هم وژل شوي او ۵ نور یې ټپيان شوي دي.

د ځانګړو ځواکونو د عملياتو قول اردو د يوې خبرپاڼې په خپرولو سره ويلي دي چې په دغه هوايي بريد کې په بلخ کې د وسله والو طالبانو د استخباراتو مسوول اجمل ماشک له  ٨ نورو وسله والو طالبانو سره ووژل شو.

د رارسېدلو خبرونو له مخې؛ اجمل ماشک د هدفي وژنو د لارښوونې ترڅنګ له استخباراتي پلوه په بلخ کې وسله والو طالبانو ته د هدفي وژنو زمينه برابروله.

وسله والو طالبانو تراوسه په دې اړه څه نه دي ويلي.

پاى\ ذ

نمایش بیشتر

نوشته های مشابه

دکمه بازگشت به بالا