کابل (بی این اے)
یوناما کے سربراہ سے ملاقات میں قائم مقام وزیر داخلہ نے کہا کہ امارت اسلامیہ کے نمائندوں کو اقوام متحدہ کی جانب سے افغانستان کے حوالے سے منعقد ہونے والے اجلاسوں میں شرکت کا حق دیا جائے۔
وزارت داخلہ کے پریس آفس نے کہا ہے کہ قائم مقام وزیر داخلہ خلیفہ سراج الدین حقانی نے افغانستان میں اقوام متحدہ کے مشن (UNAMA) کی سربراہ روزا اوتن بائیفا سے ملاقات کی۔
اس ملاقات میں قائم مقام وزیر داخلہ خلیفہ سراج الدین حقانی نے کہا کہ گزشتہ دو سالوں میں افغانستان میں سیکیورٹی کی صورت حال میں نمایاں بہتری آئی ہے۔
انہوں نے کہا کہ امارت اسلامیہ کے نمائندوں کو افغانستان کے حوالے سے ہونے والے اقوام متحدہ کے اجلاسوں میں شرکت کا حق دیا جائے۔
خلیفہ سراج الدین حقانی نے افغانستان کے ضرورت مند لوگوں کے لیے اقوام متحدہ کی انسانی امداد کو سراہا۔
یوناما کی سربراہ اور اقوام متحدہ کے سیکریٹری جنرل کی خصوصی نمائندہ برائے افغان امور روزا اوتن بائیفا نے اس ملاقات میں کہا کہ افغانستان کی سیکیورٹی میں نمایاں بہتری آئی ہے اور دور دراز علاقوں سے مرکز کی طرف لوگوں کی نقل و حرکت میں اضافہ ہوا ہے۔
انہوں نے مزید کہا کہ مسائل کے باوجود انہوں نے مختلف شعبوں میں امداد فراہم کرنے کا سلسلہ جاری رکھا ہوا ہے۔
