کابل (بی این اے) وزیر صنعت و تجارت نورالدین عزیزی نے ہرات ایکسپورٹرز یونین کے سربراہ اور اراکین کے ساتھ ملاقات میں ملک میں ایک برآمدی زون بنانے کے منصوبے کا اعلان کیا ہے۔
وزارت صنعت و تجارت کے پریس آفس سے باختر نیوز ایجنسی کو دی گئی معلومات کے مطابق اس ملاقات میں ہرات ایکسپورٹرز یونین کے سربراہ عثمان انصاری نے یونین کے مسائل صنعت و تجارت کے قائم مقام وزیر سے شریک کیے اور انہیں حل کرنے کا مطالبہ کیا۔
اپنے گفتگو میں قائم مقام وزیر صنعت و تجارت نے برآمد کنندگان کو ملک کی ریڑھ کی ہڈی قرار دیا اور کہا کہ وزارت صنعت و تجارت ملک کے متعدد صوبوں میں ایکسپورٹ زونز بنانے کے منصوبے پر کام کر رہی ہے جن میں سے ایک پر جلد کابل میں کام شروع ہو جائے گا۔
انہوں نے ہرات ایکسپورٹرز یونین کے عہدیداروں سے تعاون کا وعدہ کیا اور ان سے کہا کہ وہ اپنے مسائل تحریری طور پر وزارت صنعت و تجارت کے ساتھ شیئر کریں۔
ایک اور خبر کے مطابق صنعت و تجارت کے قائم مقام وزیر اور زنداجان ضلع کے برآمد کنندگان اور باغبانوں نے انجیر، انگور اور زعفران کی بیرون ملک برآمد میں درپیش مسائل کے بارے میں تبادلہ خیال کیا۔
اس ملاقات میں ملک کے سرمایہ کاروں نے اپنی گفتگو میں ہرات کے زعفران، انجیر اور انگور کی بیرون ملک مارکیٹنگ پر زور دیا۔
قائم مقام وزیر صنعت و تجارت نے افغان مصنوعات کی خطے اور دنیا کے ممالک میں مارکیٹنگ کے سلسلے میں امارت اسلامیہ کی کوششوں کی یقین دہانی کرائی اور کہا امارت اسلامیہ افغانستان اور وزارت صنعت کے عمائدین کی کوششوں سے ہم نے خطے اور دنیا کو ماضی کی بنسبت ملکی تاریخ میں پہلی بار سب سے زیادہ برآمدات کی ہیں۔
انہوں نے مذکورہ ضلع کے باغبانوں اور برآمد کنندگان سے کہا کہ وہ انجیر، انگور اور زعفران کی پیداوار کے درست اعدادوشمار فراہم کریں تاکہ وزارت صنعت و تجارت اس کی بیرون ملک فروخت اور برآمد پر کام کر سکے۔
واضح رہے کہ قائم مقام وزیر صنعت و تجارت گزشتہ روز اپنے سرکاری دورے پر ہرات گئے تھے۔
