۱۳ حوت ۱۴۰۲
افغانستان اسلام امیرلیگی ریاست الوزراء سیاسی اورین باسری حرمتلی مولوی عبدالکبیر افغانستان اوچون اروپا بیرلشمه سی نینگ مخصوص نماینده سی توماس نیکلسون و اورپا بیرلشمه سی کارداری خانم رافیلا یودیچی و یولداش هیایتی بیلن اوچره شیب ملاقات قیلدی.
سپیدار قصریده بولیب اوتگن بو اوچره شووده بیرینچیدن نیکلسون جنابلری افغانستانگه کیلگنیدن خورسندلیک قیلیب ایتیشیچه، بیزلرنینگ دین یمیز فرقلی دیر لیکن هنوز هم مشترکاتلریمیز بار. بیزلر انسان پرورلیک یاردملریمیزنی سیاسیتگه قوشمه یمیز. افغانستانده بولیب انسان پرورلیک یاردملریمیزگه دوام بیره میز دیدی.
نیکلسون جنابلری نینگ سوزلریگه کوره، بیزلر افغانلرگه کمک قیلیشنی ایسته یمیز و بولرگه همکار بولمه میز. اسلام امیرلیگی هم چیدملی بولیشی بیلن بیرگه بیز و سیزلر قیله آله میز مذاکره آرقه لی موجود قیین چیلیکلر اوچون حل یول تاپیشیمیز ممکن دیر.
افغانستان اوچون اورپا بیرلشمه سی نینگ نماینده سی افغانستانلیک قیزلر و ایرککلر تحصیل نی ایسته یدی و بیزلر ایککی قتلم نینگ هم تحصیلینی حمایت قیله میز دیه تیلگه آلدی. قیزلر و ایرکک لر یوزیگه بیر سانده مکتبلر ایشیگی آچیلیشینی امید قیله میز دیدی او.
نیکلسون جنابلری اسلام امیرلیگی هم حکومت دن تشقریده گی افغان متخصص و ملکلی کیشیلرگه قولاق سالیشی کیره کلیگینی پیشنهاد قیلدی.
کیینچه لیک ریاست الوزراء سیاسی ایشلر بوییچه اورین باسری حرمتلی مولوی عبدالکبیر گپیریب ایتیشیچه، افغانستان اروپا بیرلشمه سی نینگ رولیگه اهمیت قایل دیر و امید ایته میز که اروپا بیرلشمه سی بیلن اسلام امیرلیگی اورته سیده گی علاقه لر کوپراق مستحکم له نیشی اوچون ثمره لی سعی و حرکتلر آلیب باریلسین.
حرمتلی مولوی عبدالکبیر جنابلری، اسلام امیرلیگی رسمیتگه تانیلیشی اوچون برچه کیره کلی شرایط نی تکمیل ایتگن دیر، دیمک دنیا جماعه چیلیگی اسلام امیرلیگینی رسمیت گه تانیشی کیره ک و بیرلشگن ملتلر تشکیلاتیده افغانستان چوکیسی اسلام امیرلیگی نماینده سیگه بیریلسین.
ریاست الوزراء سیاسی اورین باسری نینگ کوپه یتیریشیچه، افغانستان اسلام امیرلیگی دنیا بیلن تعامل و دوستلیکنی ایسته یدی و بیر- بیراوگه حرمت قیلیشگه امیدوار و اروپا بیرلشمه سی ایسه بو شرایطنی یره تیشی کیره ک. شونینگ دیک او دنیا جماعه چیلگی اینیقسه اروپا بیرلشمه سیدن افغانستان قیته قوریلیشی اوچون اولکن حصه قویشیش نی طلب قیلدی.
حرمتلی مولوی عبدالکبیر جنابلری، اسلام امیرلیگی مذاکره و کیلیشوو اوچون تیار و دنیا دن هم هر بیر قیین چیلیک نی اسلام امیرلیگی بیلن اورته گه قوییشنی ایسته یدی.
اونینگ کوپه یتیریشیچه، افغانستان بویلب خوفسیزلیک تامینلگن، مخدرماده نینگ ایکیش، قاچاق و تولید ایتیش نینگ آلدی آلینگن، جنایی جرم آلدی آلینگی و اداری فساد ایسه بوتولنله ی آلدی آلینگن دیر.
ریاست الوزراء سیاسی اورین باسری نینگ تاکیدله شیچه، انسان حقوقلری اسلام و افغانلر فرهنگی چهار چوبه سیده رعایت قیلینه دی و اسلام امیرلیگی بونگه متعهد دیر. اونگه کوره، دینی همده زمانوی تعلیم برچه نینگ حقی دیر و بو توغریده دنیا جماعه چیلیگی نینگ یاردمینی ایسته یمیز دیدی.
شونینگدیک حرمتلی مولوی عبدالکبیر جنابلری اوزی نینگ سوزلری اداغیده، هیچ بیر گروه و شخص گه افغانستان توپراغینی استعمال قیلیش اوچون رخصت بیریلمه یدی و حاضرگچه هم افغانستان باشقه لر اوچون تهدید بولووچی هیچ قنده ی بیر اثباتلاوچی حجت موجود ایمس دیر.
