کابل ۲۹ حوت باختر
فوتبال بوییچه افغانستان ملی تیرمه جماعهسی جهان قهرمانلیگی و آسیا ملتلر جامیگه سرهلش نینگ ایکّینچی باسقیچیدهگی ایلک اویینیده هندوستانگه قرشی میدانگه توشهدی.
اوشبو اویین پنجشنبهگه اوتر کیچهسی ساعت ۱۱:۳۰ده سعودی عربستاندهگی صمک خمیس مشیط ستدیونیده بولیب اوتهدی.
افغانستانده بیر نیچه آی آلدین یکونلنگن اوشبو اویینلر نینگ بیرینچی باسقیچیگه نسبتاً اوز ترکیبیده جوده کوپ اوزگریشلر کیلتیرگن.
فوتبال بوییچه افغانستان ملی تیرمه جماعهسی باش مربيی بولهجک خلقارا اویینلر اوچون جماعهگه بیر قنچه ینگی فوتبالچیلرنی تکلیف قیلدی.
بولر قطاریده امین نبی زاده نی هم قید ایتیشیمیز ممکن. اوشبو فوتبال اویینچیسی انگلستان نینگ “واتفورد” کلوپی نینگ ایکّینچی جماعهسیده اوینهیدیگن فوتبالچی.
افغانستان بو باسقیچده هندوستان بیلن ایکّی بار توقنهش قیلهدی.
ایکّی جماعه نینگ جواب اویینی کیلهسی هفته نینگ سهشنبه کونی، حمل آیی نینگ ییتّینچی کونی بولیب اوتهدی، اویین هندوستاندهگی اندراگاندی ستدیونیده افغانستان وقتی بیلن کیچکی ساعت آلتیده بولیب اوتهدی.
متخصصلر فوتبال بوییچه افغانستان ملی تیرمه جماعهسی نینگ حاضرگی ترکیبیده اقتدارلی و ایجادکار اویینچیلر نینگ بارلیگینی اوشبو جماعه موفقیتی نینگ یخشی بیلگیسی دیب بهالهماقده و تیرمه جماعه نینگ جهان قهرمانلیگی و آسیا ملتلر جامیگه چیقیشینی اوزاق دیب حسابلهمهیدی.