کابل ۱۵ دلو باختر
پاکستان مؤقت حکومتی خوفسیزلیک تهدیدلریگه قره‌مه‌ی، بو مملکتده عمومی سیلاولر بیلگیلنگن وقتده اوتکزیلیشینی معلوم قیلدی.
مطبوعات انجمنیده پاکستان مؤقت حکومتی اخبارات وزیری آب-هوا شرایطی، تهدیدلر یاکه چیگره‌ده‌گی ترتیبسیزلیکلر طفیلی سیلاولر نینگ قالدیریلیشی حقیده‌گی هر قنده‌ی تخمینلرنی اساسسیز دیب اته‌دی.
غلام مرتضی سولنگی نینگ ایتیشیچه، پاکستان سونگگی آیلرده خوفسیزلیک بیلن باغلیق معمالرگه دوچ کیلماقده، اما هیچ قنده‌ی عامل عمومی سیلاولرنی اوتکزیشنی کیچیکتیرمیدی یاکه کیینگه قالدیرمه‌یدی.
پاکستانده سیلاولر کیله‌سی هفته پنجشنبه کونی بولیب اوته‌دی “۱۹ دلو ۱۴۰۲”. اوشبو آواز بیریشده پنجاب، خیبرپختونخوا، سند و بلوجستانده ملی مجلس و ۴ ته شتات (ایالت) مجلسی سیلاولری اوتکزیله‌دی. پاکستان حکومتی عمومی سیلاولر اوتکزیلیشی مناسبتی بیلن ۱۹ دلونی رسمی دَم آلیش کونی دیب اعلان قیلدی و سیلاولر خوفسیزلیگینی تأمینلش اوچون ۲۷۰ مینگدن آرتیق عسکر سفربر ایتیلدی.
پاکستانده بو ییلگی سیلاولرده ۱۲۵ میلیون و ۸۸۵ مینگ و ۷۶۰ کیشی اویه (رای) بیریش شرایطی گه اویغون، و جمله‌دن، ۶۹ میلیون و ۲۶۳ مینگدن آرتیق ایرکک و ۵۹ میلیون و ۳۲۲ مینگدن آرتیق عیال آواز بیریش حقوقیگه ایگه و تورلی مملکتلردن ۹۲ کیشی خلق‌ارا کوزه‌تووچی اشتراک ایته‌دی.
