کابل / د مرغومي ٦مه / باختر : د افغانستان د اسلامي جمهوریت جمهورريیس محمد اشرف غني بدخشان ولایت ته د سفر پر مهال پرون مازدیګر په لویه ولسي غونډه کې ګډون او وینا وکړه.
دجمهوررييس دوياند دفتر باختراژانس ته خبر ورکړ: په پیل کې د بدخشان والي محمدذکریا سودا د هیواد جمهورريیس ته د ښه راغلاست پر مهال د بدخشان ولایت د امنیتي، اجتماعي او انکشافي وضعیت په اړه وویل ، په انکشافي وضعیت کې مثبت تغییرات راغلي اود بدخشان په کچه څو ټولګټې پروژې تطبیق شوي دي. هغه زیاته کړه، د بدخشان ولایت عواید د تېر کال په پرتله ۸ سلنه زیات شوي. د بدخشان والي همدارنګه وویل، د بدخشان په ولسوالیو کې د امنیتي او دفاعي ځواکونو وروستیو عملیاتو مثبته پایله لرلې او څلور ولسوالۍ په بشپړه توګه د وسله والو تروریستانو له شتون پاکې شوي دي. نوموړي د امنیتي او دفاعي ارګانونو رهبرۍ ته د جمهورريیس د پاملرنې مننه وکړه ويې ویل، اوس هم ګواښ موجود دی او دچاڼيزوعملیاتود دوام غوښتنه یې وکړه. والي وړاندیز وکړ چې د بدخشان لس ولسوالۍ په ځانګړي ډول د تروریستانو له وجود څخه تازه پاکې شوې ولسوالۍ دې د ولسي تړون په پروګرام کې شاملې او د فیض اباد روغتون دې حوزوي روغتون ته ارتقا ومومي. نوموړی د بدخشان ولایت د شهیدانو د ورثې او معلولینو د حقونو د ورکړې غوښتونکی شو او ويې ویل، مالدارۍ، توریزم جلبولو، د قانوني او معیاري کانونو استخراج، اوبو مدیریت او چین نه بدخشان ته د نوري فایبر تمدید ته پاملرنه کولای شي د خلکو د بېوزلۍ په له منځه وړلو او د اقتصادې کچې په لوړولو کې اغیزمن واقع شي. په دې غونډه کې د بدخشان د ولایتي شورا ريیس بشیر صمیم، په ولسي جرګه کې د بدخشان د خلکو استازو ډاکټر ضیا یفتلي او ډاکټرې نیلوفر ابراهیمي د کانونو د قاچاق د مخینوي او د قانوني اسختراج ، مواصلاتي لارو د احیا، خلکو په ځانګړي ډول ښځو ته د روغتیایي خدمتونو د پاملرنې او د بدخشان د ولسوالیو د امنیت د ټینګښت په اړه خپلې غوښتنې بیان کړې. جمهورريیس غني د هیواد د امنیتي او دفاعي ځواکونو په لیکو کې د بدخشان د ځوانانو د پام وړ ونډې په خاطر د مننې پر مهال وویل، د بدخشان ځوانان زموږ د نورو وطنوالو ترڅنګ د هیواد په هر ګوټ کې له وطن دفاع کوي. هغه زیاته کړه، بدخشان د ملي یووالي زانګو ده. جمهورريیس د امنیتي او دفاعي ځواکونو وروستیو عملیاتو او د تروریستانو له وجود څخه د څلورو ولسوالیو تصفیې ته په اشارې وویل، زموږ ځواکونو ثابته کړه چې کولای شي موږ ته د تروریستانو له شره نجات راکړي، زموږ ژمنه داده چې عملیات به په چټک ډول دوام ولري.
هغه زیاته کړه، امنیتي جامع پلان په لاس کې لرو او په مرحله وار ډول پلی کېږي. جمهورريیس محمداشرف غني همداراز وویل، د تصفیه شویو ولسوالیو د هوساینې او وضعیت د ښه والي لپاره دوامداره کار کېږي. د هیواد جمهورريیس د بدخشان له ځوانانو څخه چې مخکې یې د امنیتي او دفاعي ځواکونو په لیکو کې خدمت کړی وغوښتل چې سیمه یېزې اردو سره یو ځای شي او د خپل ولایت د امنیت په ټینګښت کې برخه واخلي. هغه زیاته کړه، په ولسوالیو کې د امنیت د تامین لپاره د دولتي خدمتونو په وړاندې کولو کې پراخو اصلاحاتو ته اړتیا ده. جمهورريیس غني د شهیدانو ورثې ته د حقونو په ورکړه کې د ځنډ په اړه وویل، د شهیدانو ورثې ته د حقونو په ورکړه کې ځنډ په هیڅ ډول د منلو نه دی او د ملي امنیت سلاکار ته یې لارښوونه وکړه چې ژر دې دغې ستونزې ته رسیدګي وشي. د هیواد جمهورريیس د بدخشان خلکو ته په فیض اباد ښار کې د خرقې مبارکې جامع جومات جوړولو مبارکي وويله او زیاته یې کړه، د فیض اباد د عیدګاه جومات جوړولو ته ۸۰ میلیونه افغانۍ ځانګړې کېږي. هغه زیاته کړه، د اوبو ملي برنامه ژر بشپړېږي چې د سیندونو د غاړو جوړول او استحکامات پکې لومړیتوب لري. دی ته په کتو چې اوس د لاجوردو قیمتي ډبرې په ناقانونه ډول استخراجېږي جمهور ريیس غني د بدخشان له پانګوالو وغوښتل چې د لاجورد قیمتي ډبرو د پروسس لپاره خپلې طرحې ترتیب کړي او د اړتیا پر مهال دولت مشارکت ته هم چمتو دی. هغه زیاته کړه، د سیمه ییز اقتصاد د ودې په خاطر به سرحدي بازارونه له تاجکستان سره پراختیا ومومي. پاى ذ
