په کندز کې ديوځانمرګي بريد له امله د پنځه څلويښتو تنو مرګ ژوبله.

کابل – باختر دوږې دمياشتې ٨
په کندز ولايت کې ديوځانمرګي بريد له امله د دغه ولايت د دشت ارچى د ولسوال په ګډون  يوولس تنه  ووژل شول او څلور ديرش تنه نور ټپيان شول .
دغه پيښه نن سهار په اته نيمو بجو د دشت  ارچى ولسوالۍ د قرلق په  سيمه  د مولوي غازي دجومات په وړاندې وشوه.
ځانمرګې بريد په خپل بدن  پورې تړلي چاوديدونکې توکې هغه وخت وچول  چې    د دشت ارچي ولسوال له يو شمير نورو سيمه ييزو مسوولينو سره د يو قومي مشر دفاتحې په مراسمو کې له ګډون  وروسته له جومات   څخه  خپلو کورونوته  ته  روان وو .
د کندز دپوليسو ويندوى  سيد سرور حسيني  باختر آژانس ته وويل   :
په دې ځانمرګې بريد کې ددغه ولايت د دشت ارچى ولسوال شيخ  صدرالدين له نهو تنو نور سره  ووژل شو.
ويل کيږي د دشت ارچى دولسوالۍ  ادارې مدير، د دغې ولسوالۍ دپوليسو يو افسر ،د يو پخوانۍ جهادي قوماندان غوث الدين  ورور او  دوه تنه  قومي مشران هم  د دغې  پيښې په قربانيانو کې شامل دي  .
له بله پلوه  ددشت ارچى ولسوالۍ سيمه ييز مسوولين وايي د دغه ځانمرګې بريد له امله څلور ديرش تنه  نور ټپيان شوي دي  .
دکندز روغتيايي چاروکې وايي ددغې پيښې زياتره قربانيان  او ټپيان ملکي وګړي   دي چې دفاتحې په مراسمو کې يې ګډون کړى وو .
دکندز دپوليسو ويندوى طالبان د دغې خونړي ځانمرګې بريد مسوول بولي  او وايي امنيتي ځواکونو د دغه بريد د عاملينو دپيژندلو او نيولو لپاره  پلټنې پيل کړي دي .